ورتالىق ازياداعى العاشقى فۋتبول اكادەمياسى تالعاردا سالىنادى

جوبا تالعار اۋدانىنداعى جۇمىس ىستەپ تۇرعان «اقبۇلاق» سپورت ورتالىعىنىڭ بازاسىندا جۇزەگە اسىرىلۋدا. 2024 جىلدىڭ قىركۇيەك ايىندا «Sport Asset Management» قوعامدىق بىرلەستىگى مەن «Doscar Group» جشس يسپانيالىق «اتلەتيكو دە مادريد» فۋتبول كلۋبىمەن بىرلەسكەن قىزمەت تۋرالى كەلىسىمگە قول قويدى. وسى كەلىسىم اياسىندا ورتالىق ازيادا العاشقى «اتلەتيكو دە مادريد قازاقستان» فۋتبول اكادەمياسىن قۇرۋ جوسپارلانعان.

اكادەميا قۇرىلىسى ءۇش كەزەڭمەن جۇرگىزىلەدى. ءبىرىنشى كەزەڭ – بالالار اكادەمياسىنىڭ نىساندارىن سالۋ – 2025 جىلدىڭ مامىرىندا باستالىپ, 2026 جىلدىڭ سوڭىنا دەيىن اياقتالادى دەپ كۇتىلۋدە. قازىرگى تاڭدا قوناقۇي عيماراتى قايتا جاڭارتىلىپ, ءبىر فۋتبول الاڭىنىڭ رەكونسترۋكتسياسى قارقىندى جۇرگىزىلۋدە. بۇل نىساننىڭ پايدالانۋعا بەرىلۋ مەرزىمى – 30 ماۋسىم.

قازىرگى ۋاقىتتا كەلەسى نىساندار بويىنشا جوبالىق قۇجاتتامالاردى كەلىسۋ جۇمىستارى جۇرگىزىلۋدە. تارقاتار بولساق, 20 كيىم اۋىستىراتىن بولمەسى, دۋش كابينالارى, مەديتسينالىق پۋنكتتەرى, جاتتىعۋ جانە كونفەرەنتس-زالدارى, كورەرمەندەرگە ارنالعان الاڭدارى بار اكىمشىلىك-تۇرمىستىق كەشەن. سونداي-اق, قىس مەزگىلىندە جاتتىعۋعا ارنالعان جاساندى جابىنى بار جابىق كاركاستى فۋتبول زالى جانە جاساندى توسەمى بار ەكى اشىق فۋتبول الاڭى, قاقپاشىلارعا ارنالعان جاتتىعۋ الاڭى بويىنشا كەلىسۋ جۇمىستارى جاسالۋدا. بۇرىنعى ساداق اتۋ عيماراتىن زاماناۋي وتكىزۋ پۋنكتىنە اينالدىرۋ, ياعني كىرۋ ايماعى, سانيتارلىق توراپتار, كۇتۋ زالى جانە كافەتەري قاراستىرىلعان. 

جوبانىڭ ەكىنشى كەزەڭىندە كاسىبي فۋتبول كوماندالارىنا ارنالعان ينفراقۇرىلىم قۇرىلماق.

ال ءۇشىنشى كەزەڭدە 10 000 كورەرمەنگە ارنالعان ۇلكەن ستاديون سالۋ كوزدەلىپ وتىر.

اكادەميا تەك سپورتتىق بازا عانا ەمەس, بولاشاقتا الەمدىك دەڭگەيدەگى فۋتبولشىلاردى دايىندايتىن ورتالىققا اينالىپ, قازاقستاندىق فۋتبولدىڭ دامۋىنا جاڭا سەرپىن بەرەدى دەپ كۇتىلۋدە.

اتالعان جوباعا الماتى وبلىسىنىڭ اكىمدىگى جان-جاقتى قولداۋ كورسەتەدى. ينفراقۇرىلىممەن قامتاماسىز ەتۋ, قاجەتتى رۇقسات قۇجاتتارىن جەدەلدەتۋ جانە قۇرىلىس بارىسىن ۇيلەستىرۋ – ءوڭىر باسشىلىعىنىڭ تۇراقتى باقىلاۋىندا.

الماتى وبلىسى