اتالعان مالىمەتتەر 5 ماۋسىمدا ۇكىمەت ۇيىندە پرەمەر-ءمينيستردىڭ ورىنباسارى – ۇلتتىق ەكونوميكا ءمينيسترى سەرىك جۇمانعاريننىڭ توراعالىعىمەن وتكەن جەر رەسۋرستارىن ۇتىمدى پايدالانۋ ماسەلەلەرى جونىندەگى رەسپۋبليكالىق كوميسسيا وتىرىسىندا ايتىلدى, دەپ حابارلايدى Egemen.kz ۇكىمەتتىڭ ءباسپاسوز قىزمەتىنە سىلتەمە جاساپ.
اۋىل شارۋاشىلىعى مينيسترلىگى جەر رەسۋرستارىن باسقارۋ كوميتەتىنىڭ (جربك) مالىمەتىنشە, 2022–2024 جىلدارى مەملەكەتتىك مەنشىككە قايتارىلعان 12,2 ملن گەكتار جەردىڭ 5,9 ملن گەكتارى قايتا ءبولىندى. ونىڭ ىشىندە, ەلدى مەكەن ماڭىنداعى 2 ملن گەكتار جايىلىم جەرگىلىكتى حالىقتىڭ مال جايۋى ءۇشىن ورتاق پايدالانۋعا بەرىلدى. ال العان 3,9 ملن گەكتار جەر اۋىل شارۋاشىلىعى تاۋار وندىرۋشىلەرى اراسىندا كونكۋرس ارقىلى تاراتىلعان.
سوڭعى ءۇش جىلدا جەرگىلىكتى ينسپەكتسيالاردىڭ ارالاسۋىنان كەيىن بۇرىن پايدالانىلماي جاتقان 3,8 ملن گەكتار جەردى بۇرىنعى جەر يەلەرى قايتا يگەرە باستاعان.
2025 جىلى مەملەكەتتىك مەنشىككە قايتارىلۋى جوسپارلانعان 2 ملن گەكتار اۋىل شارۋاشىلىعى اينالىمىنداعى جەردىڭ قازىردىڭ وزىندە 979,1 مىڭ گەكتارى قايتارىلعان.
جەر رەسۋرستارىن باسقارۋ كوميتەتىنىڭ توراعاسى مۇرات تەمىرجانوۆ اۋىل شارۋاشىلىعى ماقساتىنداعى جەرلەردى ءتيىمدى ءارى اشىق ءبولۋ تەتىكتەرىن ازىرلەۋ بويىنشا اتقارىلىپ جاتقان جۇمىستار تۋرالى باياندادى. نەگىزگى قادامداردىڭ ءبىرى – مالىمەتتەردى تسيفرلاندىرۋ جانە جەر تەلىمدەرىن ءبولۋ بويىنشا ەلەكتروندى كونكۋرستارعا كوشۋ.
«بۇگىنگە دەيىن ءشول جانە شولەيت القاپتاردى قوسپاعاندا, اۋىل شارۋاشىلىعى اينالىمىنداعى بارلىعى 205,5 ملن گەكتار جەر تسيفرلاندىرىلدى. 2025 جىلدىڭ سوڭىنا دەيىن كارتالار دەرەكتەرىن ءتيىستى كوورديناتتىق جۇيەگە جۇكتەۋ جوسپارلانىپ وتىر», دەپ جالعاستىردى مۇرات تەمىرجانوۆ.
سونىمەن قاتار جيىندا بەلسەندى اۋىل شارۋاشىلىعى تاۋارىن وندىرۋشىلەردىڭ جەر پايدالانۋ قۇقىعىن ۇزارتۋ جانە ماۋسىمدىق شارۋاشىلىقتاردىڭ قىزمەتىن رەتتەۋ ماسەلەلەرى قارالدى.