قازاقستان قارجى ءمينيسترى ءمادي تاكيەۆ قىتاي حالىق رەسپۋبليكاسىنىڭ استاناسى بەيجىڭدە وتكەن شانحاي ىنتىماقتاستىق ۇيىمىنا (شىۇ) مۇشە مەملەكەتتەردىڭ قارجى مينيسترلەرى مەن ورتالىق بانكتەرىنىڭ باسشىلارىنىڭ كەزدەسۋىنە قاتىستى, دەپ حابارلايدى Egemen.kz.
كەزدەسۋدىڭ اشىلۋىندا قحر مەملەكەتتىك كەڭەسىنىڭ ۆيتسە-پرەمەرى دين سيۋەسيان شىۇ-نىڭ ايماقتىق جانە حالىقارالىق ەكونوميكالىق ىنتىماقتاستىقتى نىعايتۋداعى ماڭىزدى ءرولىن اتاپ ءوتتى. ونىڭ ايتۋىنشا, ۇيىم بۇگىندە ساۋدا-ەكونوميكالىق ءوزارا بايلانىستاردى دامىتۋدىڭ پارمەندى الاڭىنا اينالىپ وتىر.
شارا اياسىندا قاتىسۋشىلار شىۇ كەڭىستىگىندەگى كوپجاقتى ىنتىماقتاستىقتىڭ بولاشاعى مەن وزەكتى ماسەلەلەرىن تالقىلادى. اتاپ ايتقاندا, ساۋدا-ەكونوميكالىق ىقپالداستىق, قارجى سالاسىنداعى ينتەگراتسيا, سونداي-اق جاھاندىق تۇراقسىزدىق جاعدايىنداعى ماكروەكونوميكالىق ساياساتتى ۇيلەستىرۋ ماسەلەلەرىنە باسا نازار اۋدارىلدى.
«قازاقستان شىۇ شەڭبەرىندەگى ىنتىماقتاستىقتى ماڭىزدى ستراتەگيالىق باسىمدىق رەتىندە قاراستىرادى جانە نەگىزگى باعىتتار بويىنشا ءوزارا ءتيىمدى ارىپتەستىكتى بەلسەندى دامىتۋعا مۇددەلى», دەدى قر قارجى ءمينيسترى ءمادي تاكيەۆ.
كەزدەسۋ اياسىندا مينيستر ءمادي تاكيەۆ قىتاي حالىق رەسپۋبليكاسىنىڭ قارجى ءمينيسترى لان فوانمەن ەكىجاقتى كەلىسسوزدەر وتكىزگەن. تاراپتار حالىقارالىق قارجى نارىعىنداعى قازىرگى احۋالدى تالقىلاپ, قازاقستان مەن قىتاي اراسىنداعى قارجى-ەكونوميكالىق سەرىكتەستىكتى ودان ءارى كەڭەيتۋ ماسەلەلەرىن پىسىقتادى.