تۇركىستان وبلىسىندا كوكونىس پەن باقشا داقىلدارىنىڭ العاشقى ونىمدەرى جينالا باستادى. جەتىساي اۋدانىنىڭ ديقاندارى مامىردىڭ سوڭعى كۇندەرىندە العاشقى قاربىزدارىن جيناپ, جونەلتۋگە كىرىستى, دەپ حابارلايدى Egemen.kz.
شارۋالار سۋ تاپشىلىعىن سەزىنبەي, ەگىستىككە دەر كەزىندە سۋ جەتكىزىلگەنىن ايتىپ, سۋ رەسۋرستارى جانە يرريگاتسيا مينيسترلىگىنە جانە «قازسۋشار» مەكەمەسىنىڭ جەرگىلىكتى فيليالىنا العىس ايتتى.
«بيىل ەككەن قاربىز بەن قىزاناق پىسۋگە جاقىن. وسىنشا القاپقا ۋاقىتىلى سۋ جەتكىزىپ وتىرعان «قازسۋشار» فيليالىنا العىس بىلدىرەمىز. بيىلعى العاشقى قاربىزىمىزدى جونەلتۋگە دايىنبىز. سۋ جاقسى بەرىلگەندىكتەن قاربىز سۋدى كوپ ءسىڭىرىپ, جاقسى ءوستى. «قازسۋشارمەن» كەلىسىمشارتقا دا وتىردىق», دەدى تۇركىستان وبلىسى جەتىساي اۋدانى تىڭ اۋىلىنىڭ ديقانى قۋانباي بەكسۇلتان. «بۇگىن مىنە قاربىز ارتىپ جاتىرمىز. ەككەن قاربىزىمىز, كوكونىسىمىز سۋدان تارىققان جوق. سۋدى جەتكىزىپ بەرىپ, قازۋ قاجەت بولعان جەردى قازىپ بەرىپ, كومەك كورسەتىپ وتىرعان اۋدانىمىزدىڭ «قازسۋشار» فيليالىنا راقمەت», دەدى اتامەكەن اۋىلىنىڭ ديقانى تەلتاي تۇرعىنبەك.بيىل سۋارۋ ماۋسىمىندا وڭتۇستىك وڭىرلەردەگى «قازسۋشار» فيليالدارى ديقاندارعا 2,5 ملرد تەكشە مەتردەن استام سۋ بەرگەن. ونىڭ ىشىندە 1,3 ملرد تەكشە مەترى تۇركىستان وبلىسىنا ءبولىنىپ, 276 مىڭ گەكتارعا جۋىق ەگىس القاپتارى سۋارىلعان.
جەتىساي اۋدانى بويىنشا 84,3 مىڭ گەكتار جەرگە 304 ملن تەكشە مەتر سۋ بەرىلسە, ونىڭ 97,5 ملن تەكشە مەترى باقشا مەن كوكونىس القاپتارىن سۋارۋعا باعىتتالعان.
«اۋا رايىنىڭ قولايلىلىعى مەن سۋ رەسۋرستارىنىڭ دەر كەزىندە بەرىلۋى – ءوڭىر ديقاندارىنا ءساۋىر ايىندا-اق قىرىققاباتتىڭ العاشقى ءونىمىن, ال مامىردىڭ سوڭىندا قاۋىن جيناۋعا مۇمكىندىك بەردى», دەپ حابارلادى سۋ رەسۋرستارى جانە يرريگاتسيا مينيسترلىگى.