مەملەكەت باسشىسى قاسىم-جومارت توقاەۆ مەملەكەتتىك تۋ كوتەرۋ راسىمىندە بيىل مەملەكەتتىلىگىمىزدىڭ بەرىك تىرەگى – اتا زاڭىمىزدىڭ قابىلدانعانىنا 30 جىل تولاتىنىن ەسكە سالىپ ءوتتى, دەپ حابارلايدى Egemen.kz
سودان كەيىن پرەزيدەنت وقۋىن ۇزدىك بىتىرگەن كۋرسانتتارعا تۋ تۇبىندە شەن تاپسىرۋ جاقسى داستۇرگە اينالعانىن ايتا كەلىپ, جاس ساربازدارعا ءسوز ارنادى.
«كوك بايراق جاۋىنگەرلەرگە ايرىقشا كۇش-جىگەر بەرەدى, وتانشىلدىق رۋحىن كوتەرەدى. وسىنداي ساتتەردە ءار ازامات تۋعان ەلگە قىزمەت ەتۋ پەرزەنتتىك پارىزى ەكەنىن تەرەڭ ۇعىنادى. «تۇلپار ءمىنىپ, تۋ العان» جاۋجۇرەك باتىرلاردىڭ ۇرپاعى ەكەنىن سەزىنەدى. وتان كۇزەتىندە تۇرعان ۇلاندارىمىزدى ءباھادۇر بابالاردىڭ بۇگىنگى ءىزباسارى دەۋگە بولادى. قاستەرلى تۋىمىزدى ءاردايىم تىك ۇستاڭىزدار! مەن بۇعان كامىل سەنەمىن! بايراعىمىز بيىكتە جەلبىرەسىن! ەلىمىز امان, جۇرتىمىز تىنىش بولسىن!», دەدى مەملەكەت باسشىسى.تۋ كوتەرۋ راسىمىنە مەملەكەتتىك ورگانداردىڭ باسشىلارى, پارلامەنت دەپۋتاتتارى, ۇلتتىق قۇرىلتاي مۇشەلەرى, «حالىق قاھارمانى» مەن «قازاقستاننىڭ ەڭبەك ەرى» اتاعىنىڭ يەگەرلەرى, جوعارى اسكەري وقۋ ورىندارىنىڭ كۋرسانتتارى مەن ولاردىڭ تۋىستارى قاتىستى.