اتباسار تەمىر جول ستانتسياسىنىڭ باستىعى پارا الدى دەگەن كۇدىكپەن ۇستالعان. بۇل اقپاراتتى ۇقك راستادى, دەپ حابارلايدى Egemen.kz.
«اتالعان تۇلعاعا قاتىستى قر قىلمىستىق كودەكسىنىڭ 366-بابى («پارا الۋ») بويىنشا سوتقا دەيىنگى تەرگەپ-تەكسەرۋ امالدارى جۇرگىزىلىپ جاتىر. قىلمىستىق-پروتسەستىك كودەكستىڭ 201-بابى 1-بولىگىنە سايكەس, وزگە مالىمەتتەر جاريا ەتۋگە جاتپايدى», دەلىنگەن حابارلامادا.
بۇعان دەيىن كەيبىر بۇقارالىق اقپارات قۇرالدارىندا شەنەۋنىكتىڭ ستانتسياداعى كىرمە جولعا يەلىك ەتەتىن جەكەمەنشىك كومپانيا باسشىسىنان 6 ميلليون تەڭگە كولەمىندە پارا الىپ جاتقان جەرىندە ۇستالعانى تۋرالى اقپارات تاراعان بولاتىن. سونىمەن قاتار, ول ەشقايدا كەتپەۋ تۋرالى قولحاتپەن بوساتىلعانى ايتىلعان. الايدا بۇل مالىمەتتەر راستالماعان.