كوكشەتاۋ قالاسىنداعى №1 ارنايى مەكتەپ-ينتەرناتتا بالالارعا ارنالعان «مەچتا» جازعى مەكتەپ لاگەرىنىڭ العاشقى ماۋسىمى سالتاناتتى تۇردە اشىلدى, دەپ جازادى Egemen.kz.
ينكليۋزيۆتى قوعامدى دامىتۋعا باعىتتالعان «Qolqanat» الەۋمەتتىك جوباسى اياسىندا ۇيىمداستىرىلعان بۇل شارا ايرىقشا ماڭىزعا يە. لاگەر تاربيەلەنۋشىلەرىنە مەرەكەلىك كوڭىل كۇي سىيلاۋ ءۇشىن بالالار ءسۇيىپ كورەتىن مۋلتفيلمدەرىنىڭ كەيىپكەرلەرى-انيماتورلار شاقىرىلىپ, ءتۇرلى ويىن-ساۋىق باعدارلامالار ۇسىنىلدى.
– بۇگىن «مەچتا» جازعى لاگەرىنىڭ اشىلۋ سالتاناتى ءساتتى ءوتتى, – دەيدى №1 ارنايى مەكتەپ-ينتەرناتىنىڭ ديرەكتورى ولگا بۋردينسكايا, – مەرەكەگە وراي Shin-Line كومپانياسى بارلىق بالالارعا بالمۇزداق تاراتتى. تۇراقتى سەرىگىمىز «قولقانات» الەۋمەتتىك جوباسى دا ۇلەس قوسا ءبىلدى. سونىمەن قاتار جىل سايىن 1 ماۋسىم – بالالاردى قورعاۋ كۇنى قارساڭىندا بىزگە كەلىپ, قولداۋ كورسەتەتىن ۇلتتىق قاۋىپسىزدىك كوميتەتى دەپارتامەنتىنىڭ وكىلدەرى بيىل دا بالالاردى قۋانتتى. ولار لاگەر تاربيەلەنۋشىلەرىنە ءتۇرلى سپورتتىق جابدىق سىيلاپ, مەرەكەنىڭ ماڭىزىن ارتتىرا ءتۇستى.
جىل سايىن دەمەۋشىلەردىڭ قاتارى ارتىپ كەلەدى. شوقان ءۋاليحانوۆ اتىنداعى كوكشەتاۋ ۋنيۆەرسيتەتى تاراپىنان 104 بالاعا ارنايى مەرەكەلىك داستارحان جايىلىپ, ءتۇرلى ءتاتتى-دامدىلەر ۇسىنىلدى. سونىمەن قاتار, باسقا دا دەمەۋشىلەر بالالارعا ارناپ تەگىن بالمۇزداقتار تاراتتى جانە سپورتتىق جابدىقتار سىيعا تارتتى. بۇل - دەمەۋشىلەردىڭ بالالارعا كورسەتكەن شىنايى قامقورلىعى مەن قولداۋىنىڭ جارقىن كورىنىسى بولدى.
لاگەردە قاۋىپسىزدىك تەحنيكاسىنا بايلانىستى ساباقتار, بي سايىستارى, سۋرەت بايقاۋلارى, تەاترلاندىرىلعان قويىلىمدار جانە كوپتەگەن تانىمدىق ءارى كوڭىلدى باعدارلامالار قامتىلعان. اشىلۋ سالتاناتىندا بالالار ولەڭ وقىپ, بي بيلەپ, كوڭىل كوتەرىپ, ەرەكشە قۋانىشقا بولەندى. ءىس-شارانىڭ سوڭىندا اق داستارحاننان ءدام تاتتى.
كوكشەتاۋ