قازاقستان رەسپۋبليكاسى جوعارعى سوتىنىڭ اكىمشىلىك ىستەر جونىندەگى سوت القاسى ازامات ح.-نىڭ تۇرعىن ءۇيدى جالعا الۋ شارتىن جاڭارتۋ تۋرالى ىسىنە نۇكتە قويدى, دەپ جازادى Egemen.kz.
ءىس ماتەريالدارىنا سايكەس, 2016 جىلعى 1 ناۋرىزدا ك. مەن تۇرعىن ءۇي جانە تۇرعىن ءۇي ينسپەكتسياسى باسقارماسى اراسىندا التى ادامنان تۇراتىن وتباسى ءۇشىن تۇرعىن ءۇيدى جالعا بەرۋ شارتى جاسالعان. كەيىننەن ك.-نىڭ قايتىس بولۋىنا بايلانىستى ونىڭ جۇبايى ح. جالعا الۋ شارتىن ءوز اتىنا جاڭارتۋ تۋرالى باسقارماعا ارىز بەرگەن. الايدا بۇل ءوتىنىش قاناعاتتاندىرىلماعان.
2023 جىلعى 26 جەلتوقساندا سوت ۇيعارىمىمەن تاراپتاردىڭ كەلىسىمى بەكىتىلىپ, ح.-عا قىزىنىڭ كامەلەتكە تولۋىنا جانە مۇگەدەكتىگىنە بايلانىستى پاتەردى جەكەشەلەندىرۋ ءۇشىن وتباسىنان شىعارۋ تۋرالى ارىز بەرۋ مىندەتتەلدى. ءوز كەزەگىندە باسقارما وتباسى قۇرامىنداعى وزگەرىستەردى ەسكەرە وتىرىپ, اتالعان ماسەلەنى بەلگىلەنگەن مەرزىمدە قاراۋى ءتيىس بولاتىن.
الايدا 2024 جىلعى 9 اقپاندا اكىمدىكتىڭ تۇرعىن ءۇي كوميسسياسى وتباسى قۇرامىنىڭ وزگەرۋىنە بايلانىستى ءۇش بولمەلى پاتەردىڭ ورنىنا ەكى بولمەلى پاتەر ۇسىنۋ تۋرالى حاتتاما قابىلداپ, جالعا الۋ شارتىن قايتا جاساۋدى ۇسىندى. بۇعان كەلىسپەگەن ح. اتالعان حاتتامانى زاڭسىز دەپ تانۋ جانە جالعا بەرۋ شارتىن جاڭارتۋ تۋرالى قولايلى شەشىم قابىلداۋعا ماجبۇرلەۋ تۋرالى تالاپپەن سوتقا جۇگىندى.
ءبىرىنشى جانە اپەللياتسيالىق ساتىداعى سوتتار ح.-نىڭ تالابىن قاناعاتتاندىردى. ءوز شەشىمدەرىندە ولار باسقارمانىڭ وتباسى قۇرامىنىڭ وزگەرۋىنە بايلانىستى بۇرىنعى پاتەردى اۋىستىرۋعا زاڭدى نەگىزى جوق ەكەنىن اتاپ ءوتتى.
جوعارعى سوت القاسى جەرگىلىكتى سوتتاردىڭ تۇجىرىمدارىمەن كەلىسىپ, باسقارمانىڭ تالاپ قويۋشىمەن جالعا الۋ شارتىن جاساسۋدان باس تارتۋى قولدانىستاعى تۇرعىن ءۇي زاڭناماسىنا جانە اكىمشىلىك راسىمدەر قاعيداتتارىنا قايشى ەكەنىن كورسەتتى. سونىمەن بىرگە شىعارىلعان سوت اكتىلەرى سەنىم قۇقىعىن قورعاۋ, زاڭدىلىق پەن اكىمشىلىك ءىس جۇرگىزۋدىڭ ادىلدىگى قاعيداتتارىنا تولىق سايكەس كەلەدى دەپ تاپتى.
وسىلايشا, جوعارعى سوت ءبىرىنشى جانە اپەللياتسيالىق ينستانتسيا سوتتارىنىڭ شەشىمدەرىن وزگەرىسسىز قالدىردى.