ەلىمىزدىڭ كولىك ينفراقۇرىلىمىن جانە وڭىرلەردىڭ اراسىنداعى بايلانىستى دامىتۋ ماقساتىندا رەسپۋبليكالىق ماڭىزى بار قاراعاندى-جەزقازعان اۆتوموبيل جولىنىڭ 572 شاقىرىمىن ءىى تەحنيكالىق ساناتتا, ەكى جولاقتى ەتىپ, جول جابىنىن جاقسارتىپ, زاماناۋي قاۋىپسىزدىك تالاپتارىنا ساي ەتىپ سالۋ جوسپارلانىپ وتىر. بۇل تۋرالى قازاۆتوجول مالىمدەدى, دەپ حابارلايدى Egemen.kz.
قازىرگى تاڭدا قارجىلاندىرۋ كوزىن انىقتاۋ بويىنشا جۇمىستار اتقارىلىپ جاتىر. جوبا كەشەندى تۇردە جۇزەگە اسادى: جوبالاۋ, قۇرىلىس جانە قولدانىسقا بەرۋ. قاراجات كوزى بەكىتىلگەننەن كەيىن دايىندىق جۇمىستارى 2025 جىلدىڭ ءىىى-ءىV توقسانىنا جوسپارلانعان.
بۇل جوبا ورتالىق قازاقستانعا عانا ەمەس, ەلىمىزدىڭ جول سالاسى ءۇشىن ۇلكەن ماڭىزعا يە بولماق. ول ايماقتار اراسىنداعى كولىك قاتىناسىن نىعايتىپ, وڭىرلەردىڭ الەۋمەتتىك-ەكونوميكالىق دامۋىنا سەپتىگىن تيگىزەدى.
سونداي-اق, رەسپۋبليكانىڭ وڭتۇستىك وڭىرلەرىمەن كولىك ءدالىزىن دامىتۋ اياسىندا ۇزىندىعى 426 شاقىرىمدى قۇرايتىن قىزىلوردا-جەزقازعان اۆتوجولىن قايتا جاڭارتۋ جۇمىستارى جۇزەگە اسىرىلىپ جاتىر. بۇل جول قىزىلوردا جانە ۇلىتاۋ وبلىستارىن قوسادى. قىزىلوردا وبلىسى بويىنشا 150 شاقىرىمنان استام جولدا جۇمىستار اتقارىلدى, ال ۇلىتاۋ وبلىسى جول-قۇرىلىس جۇمىستارى قارقىندى جۇرگىزىلۋدە. قاراعاندى مەن جەزقازعان ارقىلى سالىناتىن جول استانادان قىزىلورداعا دەيىن ەلىمىزدىڭ ترانزيتتىك الەۋەتىن ارتتىرىپ, وڭىرلەردىڭ دامۋىنا جانە قازاقستاننىڭ جول سالاسىن جاڭعىرتۋعا ۇلكەن سەرپىن بەرەدى.
قاراعاندى وبلىسى