ۇكىمەت وتىرىسىندا پرەمەر-مينيستر ولجاس بەكتەنوۆ 2025 جىلدىڭ 1 قاڭتارىنان باستاپ وتاندىق ادال تاۋار وندىرۋشىلەر اۆتوماتتى تۇردە بىرىڭعاي تىزىلىمگە ەنگىزىلەتىنىن مالىمدەدى, دەپ جازادى Egemen.kz.
پرەمەر-ءمينيستردىڭ ايتۋىنشا, اتالعان ءتىزىلىم تسيفرلىق شەشىمدەر نەگىزىندە جانە مەملەكەتتىك ورگانداردىڭ اقپاراتتىق جۇيەلەرىن بىرىكتىرۋ ارقىلى قۇرىلاتىن بولادى. بۇل جۇيە كاسىپكەرلەر ءۇشىن ارتىق قاعازباستىلىقتى جويىپ, پروتسەستى مەيلىنشە جەڭىلدەتەدى.
«جاڭادان ءوتىنىش بەرۋشىلەر قاراپايىم ءوتىنىشتىڭ جانە اۆتوماتتى تسيفرلىق تەكسەرۋ نەگىزىندە ەشقانداي بيۋروكراتياسىز قوسىلا الادى. ساراپشىلاردى شاقىرۋ مەن باسى ارتىق تەكسەرۋلەردەن ءوتۋدىڭ جانە كوپ قاعاز تولتىرۋدىڭ قاجەتى بولمايدى. بارلىعى تسيفرلىق رەجيمدە, ادامنىڭ قاتىسۋىنسىز جۇرگىزىلەدى. وسىنى باسا ايتقىم كەلەدى. بۇل ساپالى باقىلاۋدى قامتاماسىز ەتىپ, مىندەتىن ادال اتقارمايتىن تاۋار وندىرۋشىلەردى انىقتاۋعا مۇمكىندىك بەرەدى. كەلەسى جىلدىڭ 1 قاڭتارىنان باستاپ ءتىزىلىم ناقتى وتاندىق ءوندىرۋشىنى انىقتاۋ تەتىگىنە اينالادى», دەپ اتاپ ءوتتى ولجاس بەكتەنوۆ.
ونىڭ ايتۋىنشا, بۇل قادام ادال وندىرۋشىلەردى قولداپ, ساپاسىز ءونىم ۇسىناتىن جالعان كاسىپورىنداردى نارىقتان شەتتەتۋگە مۇمكىندىك بەرەدى.
الينا قايراتقىزى,
ەۇۋ 2-كۋرس ستۋدەنتى