جامبىل وبلىسىنا قاراستى قورداي اۋدانىندا تۇراتىن 144 وتباسى باسپانالى بولدى. سالتاناتتى ءىس-شاراعا قاتىسقان اۋدان اكىمى بەگزات بولاتبەكوۆ جاڭا پاتەر يەلەرىن قۋانىشىمەن قۇتتىقتادى, دەپ حابارلايدى Egemen.kz.
اۋدان باسشىسىنىڭ ايتۋىنشا, جەرگىلىكتى حالىقتى باسپانامەن قامتاماسىز ەتۋ جۇمىسى جوسپارعا سايكەس الداعى ۋاقىتتا دا جالعاسادى. ءبىرىنشى كەزەكتە حالىقتىڭ الەۋمەتتىك تۇرعىدان وسال توپتارىنا قولداۋ كورسەتۋ نازاردان تىس قالماق ەمەس.
«حالىقتىڭ الەۋمەتتىك وسال توپتارىنا قولداۋ كورسەتۋ, ولاردى قولجەتىمدى باسپانامەن قامتاماسىز ەتۋ – مەملەكەتتىك ساياساتتىڭ باستى مىندەتتەرىنىڭ ءبىرى. بۇگىن پايدالانۋعا بەرىلىپ وتىرعان تۇرعىن ۇيلەر – مەملەكەت باسشىسىنىڭ الەۋمەتتىك باعىتتاعى ساياساتىنىڭ اۋدانىمىزدا ناقتى جۇزەگە اسىپ جاتقانىنىڭ ايقىن دالەلى. بۇل – ەلدىڭ قامىن ويلاعان بىرلىكتىڭ, تۇراقتىلىقتىڭ جەمىسى دەپ بىلەمىن», دەيدى ب. بولاتبەكوۆ.
جاڭا تۇرعىن ۇيلەر قورداي اۋىلىنىڭ «شىعىس» شاعىناۋدانىندا ورنالاسقان. بارلىق باسپانا ەكى بولمەلى, ونىڭ ىشىندە جاتىن جانە قوناق بولمەلەرى, سونداي-اق اسحانا مەن اجەتحانا قاراستىرىلعان.
جامبىل وبلىسى