قازاقستان مەن وزبەكستان پارلامەنتتەرى سپيكەرلەرىنە وتاندىق جي جوبالارى كورسەتىلدى

ەرلان قوشانوۆ پەن نۋريددين يسمويلوۆ باستاعان دەپۋتاتتار ورتالىقتىڭ عىلىمي جوبالارىمەن, سونداي-اق «Astana Hub» بازاسىندا جۇزەگە اسىرىلىپ جاتقان جاساندى ينتەللەكت سالاسىنداعى الماتىلىق ستارتاپتارمەن تانىستى.

قازاقستان مەن وزبەكستان اراسىنداعى پارلامەنتارالىق ىنتىماقتاستىق كەڭەسىنىڭ ەكىنشى وتىرىسى اياسىندا قوس ەلدىڭ دەپۋتاتتارى قاسىم-جومارت توقاەۆ پەن شاۆكات ميرزيوەۆتىڭ اقپاراتتىق تەحنولوگيالار مەن جاساندى ينتەللەكت سالاسىن دامىتۋ جونىندەگى تاپسىرمالارىن جۇزەگە اسىرۋدا كۇش بىرىكتىرۋ ماسەلەسىنە ەرەكشە نازار اۋداردى.

وسىعان بايلانىستى پارلامەنت دەلەگاتسيالارى ءال-فارابي اتىنداعى قازاق ۇلتتىق ۋنيۆەرسيتەتىنىڭ جانىنداعى «Farabi Hub» بازاسىندا جۇزەگە اسىرىلىپ جاتقان جوبالارمەن تانىستى. دەپۋتاتتارعا «Farabi Robotics» وندىرىستىك روبوتوتەحنيكا قۇزىرەتتەر ورتالىعىنىڭ جوبالارى تانىستىرىلدى. سولاردىڭ ءبىرى – جەراستى شاحتالارىن تەكسەرۋگە ارنالعان روبوت-يت. عىلىمي جوبالاردان بولەك, ورتالىق وندىرىستىك كاسىپورىندارعا ارنالعان روبوتتاردى قۇراستىرۋ, باپتاۋ جانە جاڭعىرتۋ بويىنشا كادرلار دايىندايدى. سونداي-اق مۇندا وندىرىستە كەڭىنەن قولدانۋ ءۇشىن جاڭا ماتەريالداردى 3D فورماتتا باسىپ شىعارۋ جۇمىستارى جۇرگىزىلۋدە.

سونىمەن قاتار قوناقتار Astana Hub ەكوجۇيەسىنە قاتىسۋشىلاردىڭ جاساندى ينتەللەكت سالاسىنداعى بىرقاتار تابىستى ستارتاپ-جوباسىمەن تانىستى. مىسالى: Codiplay (بالالار مەن جاسوسپىرىمدەرگە تسيفرلىق داعدىلاردى ۇيرەتۋگە ارنالعان ەكوجۇيە), Pleep (جاساندى ينتەللەكت نەگىزىندەگى ونلاين-ساتىلىم مەنەدجەرىن قۇرۋ جۇيەسى), AIDENTIS (جاساندى ينتەللەكت ارقىلى ادامنىڭ ءتىس قيسايۋىن دياگنوستيكالاۋ), Dereknet جانە NeuronOil (مۇناي-گاز كەن ورىندارىنىڭ تسيفرلىق سىڭارلارىن جاساپ, مۇناي, گاز جانە باسقا كومپونەنتتەردى ءوندىرۋدى الدىن الا بولجاۋعا مۇمكىندىك بەرەتىن جۇيەلەر). بارلىق ستارتاپ قازىردىڭ وزىندە وندىرىسكە ەندىرۋ كەزەڭىنە جەتكەن, كەيبىرى شەتەلدە دە قولدانىلۋدا.

سونداي-اق دەپۋتاتتارعا «Farabi Hub» ورتالىعىنىڭ زەرتحانالارىندا الىنعان مۇناي-حيميا, مەديتسينا, باقىلاۋ-ولشەۋ ەسەپتەۋلەرى جانە باسقا سالالارداعى عىلىمي زەرتتەۋ ناتيجەلەرى كورسەتىلدى.

ءال-فارابي اتىنداعى قازۇۋ رەكتورى جانسەيىت تۇيمەباەۆ ۋنيۆەرسيتەتتىڭ دامۋ پەرسپەكتيۆالارى مەن سۋپەركومپيۋتەرلىك كلاستەردى ەنگىزۋ جۇمىسى تۋرالى بايانداپ بەردى. بۇل كلاستەردىڭ مۇمكىندىكتەرى ۋنيۆەرسيتەت عالىمدارىنىڭ عىلىمي جوبالارى مەن تاجىريبەلەرىندە كەڭىنەن پايدالانىلىپ جاتقانىن اتاپ ءوتتى.

«Astana Hub» باس ديرەكتورى ماعجان ماديەۆ ستارتاپتاردى قولداۋ ورتالىعىنىڭ ەكوجۇيەسىن تانىستىرىپ, حالىقارالىق جاساندى ينتەللەكت ورتالىعىن قۇرۋ جوسپارىمەن ءبولىستى. بۇل جوبانىڭ ماقساتى – جاساندى ينتەللەكتىنى زەرتتەۋ مەن ءتۇرلى سالالاردا قولدانۋدى قامتاماسىز ەتەتىن تۇتاس ينفراقۇرىلىم قۇرۋ.

دەپۋتاتتار سونداي-اق ءابىلحان قاستەەۆ اتىنداعى مەملەكەتتىك ونەر مۋزەيىنە باردى. قوناقتارعا ورال تاڭسىقباەۆتىڭ شىعارماشىلىعىنا ارنالعان كورمە تانىستىرىلدى. سۋرەتشى مۇراسى 100 جىلدان استام ۋاقىت بويى قازاق پەن وزبەك حالقىن بايلانىستىرىپ كەلەدى.