ورال. 6 مامىر. ورال قالاسىنداعى «جەدەل مەديتسينالىق جاردەم» ستانساسىندا اديس باعدارلاماسى بويىنشا جاسالعان اۆتوماتتاندارىلعان باسقارۋ جۇيەسىنىڭ تۇساۋكەسەر ءراسىمى ءوتتى. بۇل تۋرالى egemen.kz ءتىلشىسى حابارلادى.
ستانسا ديرەكتورى سەرگەي بەكەجانوۆتىڭ ايتۋىنشا, وبلىستاعى بارلىق جەدەل جاردەم جۇيەسى تۇگەلدەي دەرلىك اۆتوماتتاندىرىلعان. بۇل ومىرشەڭ جوبا, اسىرەسە, جەدەلدىك, ستاتيستيكالىق جانە اكىمشىلىك تۇرعىسىنان ۇلكەن جەڭىلدىكتەر اكەلىپ وتىر.
وسى تارتىپپەن اديس باعدارلاماسى تەك وبلىس ورتالىعىندا عانا ەمەس, سونىمەن بىرگە, اۋداندار مەن اۋىلداردا دا ءتيىستى باقىلاۋ جۇيەسى مەن شۇعىل مەديتسينالىق كومەكتى ىسكە اسىرا الادى. ءسال شەگىنىس جاسار بولساق, مۇنداي اۆتوماتتاندىرىلعان جۇيە تۇڭعىش رەت 2010 جىلى ورال قالاسىندا ەنگىزىلگەن. ودان كەيىنگى كەزدە بۇل جاڭاشىلدىق وبلىس اۋداندارىنا دا ورنىعا باستادى. مۇنىڭ ءوزى جوعارىدا ايتىلعانداي جەدەل جاردەم قىزمەتىنىڭ تيىمدىلىگى مەن جەدەلدىگىن كوتەردى. ونىڭ شاقىرىلعان جەرگە كەلۋ ۋاقىتىن وتىز پايىزعا تەزدەتتى. سونىمەن قاتار, اۆتوماتتاندىرۋ ەسەبىنەن تۇرعىندارعا مەديتسينالىق قىزمەت كورسەتۋ ساپاسى جاقساردى.
«اقمولا سۆياز ينۆەست» جشس كومپانياسى وكىلى مارات ايگەلەۆتىڭ ايتۋىنشا, اتالعان قوندىرعىلار رەسەيدە جاسالعان. ونىڭ الەمدىك باسەكەگە توتەپ بەرۋ قابىلەتى جوعارى. باتىس قازاقستان وبلىسى اۆتوماتتاندىرىلعان جۇيەنى ەنگىزۋ مەن ورناتۋ ءۇشىن 48 ميلليون تەڭگە جۇمسادى. ورال ءوڭىرى ازىرگە اديس باعدارلاماسى وبلىس ورتالىعىنا عانا ەمەس, سونىمەن بىرگە, اۋداندارعا دا ەنگىزىلگەن رەسپۋبليكاداعى ءبىرىنشى وبلىس بولىپ وتىر.
تەمىر قۇسايىن.
دەرەك, سۋرەت: egemen.kz.