بۇل تۋرالى تەمىرجول جانە سۋ كولىگى كوميتەتىنىڭ توراعاسى جانىبەك تايجانوۆ وكق الاڭىندا وتكەن ءباسپاسوز كونفەرەنتسياسىندا ايتتى, دەپ حابارلايدى Egemen.kz.
قازاقستاننىڭ ماگيسترالدىق تەمىرجول جەلىسى بويىنشا 154 باعىتتا پويىزدار قاتىناپ جاتىر. 2024 جىلى تەمىرجول كولىگىمەن 20,8 ملن جولاۋشى تاسىمالدانعان. ال, بيىل 22 ملن جولاۋشىنى تاسىمالداۋ جوسپارلانعان, ونىڭ ىشىندە جاز ايلارىندا – 7 ملن استام ادام.
سپيكەردىڭ ايتۋىنشا, تاسىمالدىڭ قولجەتىمدىلىگىن قامتاماسىز ەتۋ ءۇشىن جازعى ماۋسىمعا قوسىمشا 12 باعىت ۇيىمداستىرىلادى, ونىڭ ىشىندە 9 باعىت الاكولگە دەيىن قاتىنايدى, سونداي-اق استانادان الماتى, شىمكەنتكە دەيىن تاعى 3 مارشرۋتتى, بالقاش-قاراعاندى باعىتىن ۇيىمداستىرۋ جوسپارلانعان.
«اتالعان شارالار جازعى ماۋسىمدا پويىزداردا شامامەن 300 مىڭ قوسىمشا ورىن قۇرۋعا مۇمكىندىك بەرەدى. جولاۋشىلار اعىنىنىڭ ارتۋىنا بايلانىستى پويىز قۇرامدارىنىڭ ۇزىندىعى قوسىمشا ۆاگون تىركەۋ ارقىلى كەزەڭ-كەزەڭىمەن ۇلعايتىلادى, بۇل شامامەن 1 ملن قوسىمشا ورىن ۇسىنۋعا مۇمكىندىك بەرەدى», دەدى ج.تايجانوۆ.