شىمكەنتتە شيرەك عاسىردان استام حالىققا قىزمەت كورسەتكەن اتتراكتسيوندار پاركى «قيال الەمى» ساياباعى قىزمەتىڭ ءبىرجولاتا توقتاتتى, دەپ جازادى Egemen.kz اقپارات اگەنتتىگى.
شاھاردىڭ ءدال ورتالىعىنداعى پارك ءسۇرىلىپ جاتىر. وعان سەبەپ كەزىندە جەكەشەلەندىرۋ دۇرىس وتپەي, ساياباق جەر تەلىمىن كاسىپكەرلەر زاڭسىز يەمدەنگەن. سايكەسىنشە زاڭسىز حالىققا قىزمەت كورسەتكەن. قالا اكىمى عابيت سىزدىقبەكوۆتىڭ باستاماسىمەن وسى زاڭسىز ارەكەتتى توقتاتىپ, پاركتىڭ جەر تەلىمىن مەملەكەت مەنشىگىنە قايتارۋ ءۇشىن اكىمدىك سوتقا تالاپ ارىز بەردى.
ءسويتىپ شىمكەنت قالاسىنىڭ مامانداندىرىلعان اۋدانارالىق ەكونوميكالىق سوتىنىڭ شەشىمىمەن ارىز يەسى شىمكەنت قالاسىنىڭ جەر رەسۋرستارىن باسقارۋ دەپارتامەنتىنىڭ ارىزى قاناعاتتاندىرىلىپ, «قيال الەمى» ساياباعىن بۇزۋ تۋرالى سوت شەشىمى زاڭدى كۇشىنە ەندى.
و باستا رەسپۋبليكا داڭعىلىنىڭ بويىندا ورنالاسقان ساياباق جاسىل جەلەكپەن كومكەرىلگەن ادەمى پارك بولعان ەكەن. بىراق كەيىن بۇل اۋماقتى جالعا العان جاڭا قوجايىندار پاركتىڭ ىشىنە ءارتۇرلى اتتراكتسيوندار ورناتىپ تاستاعان. سوت ورىنداۋشىلار 9 اتتراكتسيون يەسىنە نىساندارىن ءوز قاراجاتى ەسەبىنەن بۇزۋ تۋرالى حابارلاما بەرگەنىن ايتادى. الايدا, ولار حابارلامانى العانمەن ونى ورىنداماعان. سوعان بايلانىستى سوت شەشىمىمەن ساياباقتىڭ جەر تەلىمىندە ورنالاسقان اتتراكتسيوندار مەن باسقا دا قۇرىلىس نىساندارى كۇشپەن بۇزىلىپ, مەملەكەتكە باستاپقى كۇيىندە قايتارىلاتىن بولادى.
شىمكەنت