ۇكىمەت وتىرىسىندا ەلىمىزدەگى الداعى جىلىتۋ ماۋسىمىنا دايىندىق بارىسى تالقىلاندى. پرەمەر-مينيستر ولجاس بەكتەنوۆ ءوڭىر اكىمدەرىنە جانە جاۋاپتى مينيسترلىكتەرگە بىرقاتار ناقتى تاپسىرما جۇكتەدى, دەپ حابارلايدى Egemen.kz.
ءوڭىر اكىمدىكتەرى بارلىق كونكۋرستىق راسىمدەردى ەكى اپتا ىشىندە اياقتاپ, جوندەۋ جۇمىستارىنا دەرەۋ كىرىسۋ قاجەت. پرەمەر-مينيستر باسى ارتىق بيۋروكراتياعا جول بەرمەۋدى تالاپ ەتتى.
«باسى ارتىق بيۋروكراتياعا جول بەرۋگە بولمايدى. بيىل ىسكە قوسۋ جوسپارلانىپ وتىرعان جاڭا جىلۋ نىساندارى بويىنشا بارلىق جۇمىستى تامىز ايىنان كەشىكتىرمەي اياقتاۋ قاجەت. اكىمدەرگە جىلۋ نىساندارىنا اپتا سايىن بارىپ, جاعدايدى جەكە باقىلاۋعا الۋدى جانە بارلىق تۋىنداعان تاۋەكەلدەر بويىنشا شۇعىل ارەكەت ەتۋدى تاپسىرامىن», دەدى ولجاس بەكتەنوۆ.ەنەرگەتيكا جانە ونەركاسىپ مينيسترلىكتەرى مەن وڭىرلەر اكىمدىكتەرىنە 10 ماۋسىمعا دەيىن جىلىتۋ ماۋسىمىنا دايىندىق جوسپارىن ناقتىلاۋ تاپسىرىلدى. سونىمەن قاتار, ۇكىمەت باسشىسى سولتۇستىك, ورتالىق جانە شىعىس وڭىرلەردە دايىندىق 15 قىركۇيەككە دەيىن, ال باسقا ايماقتاردا 15 قازانعا دەيىن تولىق اياقتالۋى ءتيىس ەكەنىن ەسكەرتتى.
«KEGOC» كومپانياسى ەنەرگەتيكا مينيسترلىگىمەن بىرلەسىپ, 15 ماۋسىمعا دەيىن ستراتەگيالىق ماڭىزى بار جىلۋ ستانسالارى ءۇشىن قاجەتتى جابدىقتاردىڭ جۇمىس رەجيمىن بەكىتۋى ءتيىس. جوندەۋ مەرزىمىن سوزۋعا نەمەسە جۇمىس كولەمىن قىسقارتۋعا جول بەرىلمەيدى. بۇزۋشىلىقتارعا جول بەرگەن مەنشىك يەلەرى مەن باسقارۋشى كومپانيالارعا قاتىستى شارالار قابىلدانادى», دەدى پرەمەر-مينيستر.
سونىمەن قاتار, ەنەرگەتيكا مينيسترلىگى مەن كولىك مينيسترلىگىنە جانە اكىمدىكتەرگە 1 قىركۇيەككە دەيىن جىلۋ كوزدەرى مەن قويمالاردا قاجەتتى وتىن قورىن جيناقتاۋ تاپسىرىلدى.
ايتا كەتەيىك, جىلىتۋ ماۋسىمىنا دايىندىقتىڭ ورىندالۋ بارىسىنا ۇكىمەت اپپاراتى تۇراقتى باقىلاۋ جۇرگىزەدى. ۇيلەستىرۋ جۇمىسى پرەمەر-ءمينيستردىڭ ءبىرىنشى ورىنباسارى رومان سكلياردىڭ جەتەكشىلىگىمەن اتقارىلادى.