ۇكىمەتتە قازاق مۇنايىن تاسىمالداۋ ماسەلەسى تالقىلاندى

كەزدەسۋدە «تەڭىز–نوۆوروسسيسك» باعىتى بويىنشا مۇناي قۇبىرىن جاڭعىرتۋ قارقىنى مەن قولدانىستاعى جانە بولاشاعى بار ينۆەستيتسيالىق باعدارلامالاردى جاڭعىرتۋ قارقىنى قارالعان. نيكولاي گوربان 2024 جىلدىڭ ناتيجەلەرى بويىنشا اقپارات بەرىپ, «كروپوتكينسكايا» مۇناي ايداۋ ستانساسىنداعى قالپىنا كەلتىرۋ جۇمىستارىنىڭ اياقتالعانىن حابارلادى.

سونداي-اق, «قازترانسويل» اق مەن كقك اراسىنداعى ارىپتەستىك اياسىندا 2024 جىلى ەكى جۇيەنى بايلانىستىراتىن جاڭا مۇناي قۇبىرىنىڭ قۇرىلىسى اياقتالىپ, پايدالانۋعا بەرىلگەنى ايتىلدى. بۇل جوبا ت.قاسىموۆ اتىنداعى مۇناي ايداۋ ستانساسىن كقك قۇبىرىنا قوسۋعا مۇمكىندىك بەردى.

«بۇگىندە ايداۋ كولەمىن جىلىنا 67 ملن توننادان 81,5 ملن تونناعا دەيىن, ونىڭ ىشىندە قازاقستاندىق ۋچاسكە بويىنشا جىلىنا 53,7 ملن توننادان 72,5 ملن تونناعا دەيىن ارتتىرۋعا تەحنيكالىق مۇمكىندىك قامتاماسىز ەتىلدى. كقك مۇناي قۇبىرىنىڭ «تار» تۇستارىن جويۋ جوباسىن ىسكە اسىرۋ ناتيجەسىندە بيىلعى قازان ايىندا مۇناي جونەلتۋ كولەمىن 1 ملرد تونناعا دەيىن جەتكىزۋ جوسپارلانىپ وتىر», دەلىنگەن حابارلامادا.

پرەمەر-مينيستر ولجاس بەكتەنوۆ كقك قۇبىرىنىڭ قازاقستان مۇناي ەكسپورتى ءۇشىن ستراتەگيالىق ماڭىزىن اتاپ ءوتىپ, ۇكىمەت تاراپىنان بارلىق قاجەتتى قولداۋ كورسەتىلەتىنىن جەتكىزدى.

كەزدەسۋدە كونسورتسيۋمنىڭ الەۋمەتتىك جاۋاپكەرشىلىگى دە نازاردان تىس قالمادى. اتاپ ايتقاندا, اتىراۋ قالاسىندا 900 ورىندىق مەكتەپ سالۋ جۇمىستارى جۇرگىزىلىپ جاتىر. وتكەن جىلى كقك تاراپىنان الەۋمەتتىك جوبالارعا 4,4 ملرد تەڭگە بولىنگەن. ال 2025 جىلى ءبىلىم بەرۋ مەن مەديتسينالىق ينفراقۇرىلىمدى دامىتۋعا باعىتتالعان جاڭا جوبالار قولعا الىنباق.

كەلىسسوزدەر قورىتىندىسىندا تاراپتار مۇناي تاسىمالى سالاسىنداعى ءوزارا ءىس-قيمىلدى ودان ءارى نىعايتۋعا نيەتتى ەكەنىن ءبىلدىردى.