مەملەكەتتىك كەڭەسشى ەرلان قاريننىڭ توراعالىق ەتۋىمەن قر پرەزيدەنتىنىڭ جانىنداعى ازاماتتىق ماسەلەلەرى جونىندەگى كوميسسيانىڭ كەزەكتى وتىرىسى ءوتتى. جيىندا قازاقستان ازاماتتىعىنا قابىلداۋ جانە ودان شىعارۋ ماسەلەلەرى قارالدى, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
وتىرىستا ەرلان قارين سوڭعى التى جىلدا ەلىمىزدىڭ ازاماتتىعىنان باس تارتقان ادامداردىڭ سانى تۇراقتى تۇردە ازايىپ كەلە جاتقانىن اتاپ ءوتتى.
مىسالى, 2019 جىلى 1,7 مىڭ ادام ازاماتتىقتان باس تارتسا, 2020 جىلى – 944, 2021 جىلى – 123, 2022 جىلى – 114, 2023 جىلى – 107, ال 2024 جىلى 77 ادام ازاماتتىقتان شىققان.
مەملەكەتتىك كەڭەسشى بۇل كورسەتكىشتەردىڭ قازاقستان ازاماتتىعى ينستيتۋتىنىڭ ابىرويى مەن تارتىمدىلىعى ارتىپ كەلە جاتقانىن, سونىمەن قاتار ەل حالقىنىڭ بولاشاققا دەگەن سەنىمى نىعايعانىن بىلدىرەتىنىن ايتتى.