پارلامەنت ءماجىلىسىنىڭ حالىقارالىق ىستەر, قورعانىس جانە قاۋىپسىزدىك كوميتەتىنىڭ دەپۋتاتتارى ششۋچينسك قالاسىنداعى شوقان ءۋاليحانوۆ اتىنداعى اسكەري كوللەدجدە كوشپەلى وتىرىس وتكىزدى, دەپ حابارلايدى Egemen.kz.
قورعانىس ءمينيسترىنىڭ تاربيە جانە يدەولوگيالىق جۇمىس جونىندەگى ورىنباسارى گەنەرال-مايور شايح-حاسان جازىقباەۆ دەپۋتاتتاردى كىشى كوماندالىق قۇرامنىڭ ماماندارىن دايارلاۋدىڭ جۇيەسىمەن جانە بەيىندى كوميتەت مۇشەلەرىن كادەتتەردى ىرىكتەۋ ءتارتىبى جايىنان حاباردار ەتتى.
زاڭ شىعارۋشى بيلىك وكىلدەرى وقۋ ورنىنىڭ ينفراقۇرىلىمىمەن, ونىڭ ماتەريالدىق-تەحنيكالىق بازاسىمەن, كادەتتەر مەن مەرزىمدى قىزمەت ساربازدارىنىڭ تۇراتىن جەرىمەن, تاماقتانۋ جانە مەديتسينالىق كومەك كورسەتۋ شارتتارىمەن تانىستى. ولار كازارماعا, اسحاناعا, سپورتزالعا بارىپ, مەديتسينالىق كابينەتتىڭ قالاي جابدىقتالعانىن كوردى.
ساپار بارىسىندا دەپۋتاتتارعا كوللەدج تاربيەلەنۋشىلەرىنىڭ مادەني بوس ۋاقىتىن, اسكەري-پاتريوتتىق تاربيەسىن جانە سپورتپەن شۇعىلدانۋىن ۇيىمداستىرۋ جايى دا ايتىلدى. قوناقتار مۇراجايعا, وقۋ ورنىنىڭ كىتاپحاناسىنا جانە سپورتزالعا باردى.
ءىس-شارا سوڭىندا دەپۋتاتتار اسكەري كوللەدجدىڭ جەكە قۇرامىمەن كەزدەستى. ماجىلىسمەندەر اسكەري ءبىلىم مەن اسكەري قىزمەتكە قاتىستى زاڭنامانىڭ ەرەجەلەرىنە تۇسىنىكتەمە بەرىپ, ونى جەتىلدىرۋ جونىندەگى كوزقاراسىمەن ءبولىستى.