استانادا Cardiff University Kazakhstan اشىق ەسىك كۇنى ءوتتى

ءىس-شاراعا قر عىلىم جانە جوعارى ءبىلىم ءمينيسترى ساياسات نۇربەك, قازاقستانداعى ۇلىبريتانيانىڭ توتەنشە جانە وكىلەتتى ەلشىسى كەتي ليچ, Cardiff University باس وپەراتسيالىق ديرەكتورى پاۋلا ساندەرسون, حالىقارالىق ىنتىماقتاستىق جونىندەگى ديرەكتورى اننا مورگان جانە ۋنيۆەرسيتەتتىڭ وزگە دە وكىلدەرى قاتىستى.

ءوز سوزىندە قر عىلىم جانە جوعارى ءبىلىم ءمينيسترى ساياسات نۇربەك مەملەكەت باسشىسىنىڭ تاپسىرماسىنا سايكەس قازاقستان اۋماعىندا الەمنىڭ جەتەكشى جوعارى وقۋ ورىندارىنىڭ فيليالدارىن اشۋ بويىنشا مينيسترلىك بەلسەندى جۇمىس جۇرگىزىپ جاتقانىن اتاپ ءوتتى. وسى باعىتتاعى ماڭىزدى ناتيجەلەردىڭ ءبىرى – كارديفف ۋنيۆەرسيتەتىمەن ىنتىماقتاستىق ورناتۋ بولدى. بۇل ۋنيۆەرسيتەت – ۇلىبريتانياداعى بەدەلدى Russell Group قۇرامىنا كىرەتىن, QS World University Rankings جانە Times Higher Education سەكىلدى الەمدىك رەيتينگتەردە تۇراقتى جوعارى ورىن الاتىن وقۋ ورنى.

ايتا كەتەيىك, 2024 جىلعى 14 تامىزدا قازاقستاندىق دەلەگاتسيا العاش رەت كارديفف ۋنيۆەرسيتەتىنە بارىپ, ونىڭ قورىتىندىسى بويىنشا قر عىلىم جانە جوعارى ءبىلىم مينيسترلىگى, «Qualified Centre of Education» قوعامدىق قورى جانە Cardiff University اراسىندا استانادا فيليال اشۋ تۋرالى ۇشجاقتى مەموراندۋمعا قول قويىلدى. كەيىن 2024 جىلعى 20 قاراشادا كارديفف ۋنيۆەرسيتەتى دەلەگاتسياسىنىڭ قازاقستانعا جاۋاپتى ساپارى بارىسىندا تاراپتار ەگجەي-تەگجەيلى كەلىسسوزدەر جۇرگىزۋگە باعىتتالعان ەكىجاقتى كەلىسىم جاساستى. ال 2025 جىلعى 25 اقپاندا كارديفف ۋنيۆەرسيتەتىنىڭ وكىلدەرى قايتا كەلىپ, اكادەميالىق باعدارلامالاردى ناقتىلاپ, ىنتىماقتاستىقتىڭ نەگىزگى ماسەلەلەرىن تالقىلادى.

2025 جىلعى قىركۇيەكتە استانادا Cardiff University Kazakhstan تولىققاندى ءبىلىم بەرۋ كامپۋسى اشىلادى. كامپۋس 2000-نان استام ستۋدەنتكە ارنالعان. بۇل – قازاقستاندا شەتەلدىك جوعارى وقۋ ورنىنىڭ جوعارى اكادەميالىق رەيتينگكە يە العاشقى فيليالى بولماق. باعدارلامالار تىكەلەي نەگىزگى ۋنيۆەرسيتەتتىڭ باسقارۋىمەن جۇزەگە اسىرىلادى. جاڭا كامپۋس اكادەميالىق ارتىقشىلىقتىڭ, عىلىمي زەرتتەۋلەر مەن حالىقارالىق جوبالاردىڭ ورتالىعىنا اينالادى. مۇندا Cardiff University جەتەكشى وقىتۋشىلارى مەن قازاقستان مەن شەت ەلدەردەن كەلەتىن تالانتتى ستۋدەنتتەر شوعىرلاناتىن بولادى.

فيليال 2025 جىلدان باستاپ STEM باعىتتارى (عىلىم, تەحنولوگيا, ينجەنەريا, ماتەماتيكا) مەن بيزنەسكە باسىمدىق بەرىلەتىن Foundation (دايىندىق) باعدارلاماسىمەن جۇمىسىن باستايدى. 2026 جىلدان باستاپ كەلەسى سالالار بويىنشا باكالاۆريات باعدارلامالارى ىسكە قوسىلادى: كومپيۋتەرلىك عىلىمدار, بيزنەس باسقارۋ, ازاماتتىق قۇرىلىس, گەولوگيا جانە پايدالى قازبالاردى بارلاۋ.

وقۋ ۇزاقتىعى – 4 جىل: 1 جىل Foundation, ودان كەيىن 3 جىل باكالاۆريات. بارلىق ساباقتار تولىقتاي اعىلشىن تىلىندە وتەدى, دارىستەر مەن پراكتيكالىق ساباقتاردى Cardiff University اكادەميالىق قۇرامى جۇرگىزەدى. استانا كامپۋسى اكادەميالىق ۇتقىرلىقتى قامتاماسىز ەتەدى جانە باسقا قالالار مەن شەت ەلدەردەن كەلگەن ستۋدەنتتەر ءۇشىن جايلى جاتاقحانامەن قامتاماسىز ەتىلەدى.

Foundation باعدارلاماسىنا قابىلداۋ تالاپتارى:

✔ IELTS اكادەميالىق تەستى – كەمىندە 5.5 ء(ار كومپونەنتتەن – كەمىندە 5.0);

✔ اتتەستاتتىڭ ورتاشا بالى (GPA) – 5.0 جۇيەسى بويىنشا كەمىندە 4.0, ماتەماتيكا پانىنەن – كەمىندە 4;

✔ ۇبت – كەمىندە 50 بالل (مەملەكەتتىك گرانتقا تۇسۋشىلەر ءۇشىن).