قوستاناي. 6 مامىر. قوستانايلىقتار جەڭىس كۇنى قۇرمەتىنە ەلوردادا وتەتىن پارادتى تاماشالايتىن ءبىر توپ سوعىس ارداگەرلەرىن استاناعا شىعارىپ سالدى. بۇل تۋرالى egemen.kz ءتىلشىسى حابارلادى.
تەمىرجول ۆوكزالىنىڭ پەررونىندا توسەلگەن قىزىل كىلەمگە جاعالاي ورىندىقتار قويىلىپ, ارداگەرلەر سوندا وتىردى. الماتى-استانا باعىتىنا جۇرەتىن «توبىل» جۇردەك پويىزى كەلىپ توقتادى. ارداگەرلەردى پەرروندا ۇرمەلى اسپاپتار وركەسترى سوعىس جىلدارىنىڭ اۋەندەرىمەن قارسى الدى. استاناداعى مەرەكەلىك پاراد قىزىعىن تاماشالايتىن 17 ارداگەردى بەس كۇتۋشى الىپ بارادى. بارلىعى دا 90-نان اسقان, ەڭ جاسىنىڭ ءوزى بيىل 90-عا كەلەدى ەكەن. الايدا, كوڭىل دەگەن كوك دونەن, كەشەگى سولداتتار سوعىس اندەرىنە كىبىرتىكتەپ باسىپ ءجۇرىپ بيلەپ تە الدى.
- سوعىس باستالعان مەنىڭ جاسىم جەتپەدى. ون جەتىگە 1943 جىلى تولدىم, سول جىلى مايدانعا اتتاندىم, بەلورۋسسيا مايدانىندا بولدىم, بەلورۋسسيانى, پولشانى ازات ەتۋگە قاتىستىم. ەلگە تەك 1950 جىلى عانا ورالدىم,-دەيدى استاناعا اۋليەكول اۋدانىنان بارا جاتقان سوعىس ارداگەرى الدابەرگەن كاچكين. — نەسىن ايتاسىڭ, 70 جىل وتسە دە سوعىس لاڭى كوز الدىمدا. ودەر وزەنىنەن وتكەندە ەكى جولداسىم سۋعا كەتتى. ءبىز ايتەۋىر اجالدىڭ جوعىنان وزەننىڭ شەتىنە زورعا شىعىپ, ءتىرى قالدىق. سول جىگىتتەر ەسىمە تۇسەدى. مۇنداي پارادقا العاش بارا جاتىرمىن, اللانىڭ بەرگەنىنە شۇكىر.
ارداگەرلەردىڭ بارلىعى دا وزدەرىنە كورسەتىلىپ جاتقان قۇرمەتكە ريزا. ولارعا ارناپ پارادتا كيەتىن بىرىڭعاي كيىم تىگىلدى. ولاردى استاناعا شىعارىپ سالۋعا وبلىس, قوستاناي قالاسىنىڭ باسشىلارى كەلدى. پويىز جۇرەردىڭ الدىندا ارداگەرلەرگە وبلىس اكىمى نۇرالى سادۋاقاسوۆ اقجول تىلەدى.
نۇرالى سادۋاقاسوۆ: «سىزدەر ءبىزدىڭ ەلىمىزدە وتكەلى وتىرعان مەرەكەلىك جەڭىس پارادىنا جۇرگەلى وتىرسىزدار. ەلىمىزدە مۇنداي دەڭگەيدەگى پاراد ءالى بولعان ەمەس. وندا تاماشا سالتاناتتى, ەلىمىزدىڭ جاقىندا عانا قايتا سايلانعان ەلباسىمىزبەن كەزدەسەسىزدەر. وكىنىشكە قاراي كوپتەگەن ارداگەرلەر بۇل كۇندى كورە المادى. استاناعا امان-ەسەن, كوڭىلدى بارىپ كەلىڭىزدەر! مەرەكەلەرىڭىز قۇتتى بولسىن!», دەدى.
ارداگەرلەر استاناعا بارعان سوڭ دەمالادى, قارت كىسىلەردىڭ پارادقا سەرگەك شىعۋى ءۇشىن ولاردىڭ دەنساۋلىعىنا قاراۋ, دەمالدىرۋ ءجىتى باقىلانادى. بۇگىندە وبلىستا 338 سوعىس ارداگەرى بار. سونىمەن قاتار الەۋمەتتىك جەڭىلدىكتەر مەن كەپىلدىكتەر سوعىس ارداگەرلەرىنە تەڭەستىرىلگەن 11 مىڭ ادام تۇرادى.
ءنازيرا جارىمبەتوۆا.
دەرەك, سۋرەت: egemen.kz