مامىر مەرەكەلەرىندە ەلگە ات ءىزىن سالعانبىز. شاڭ باسقان قالادان قوزىكوش جەر شىعىسىمەن جانىمىز جادىراپ سالا بەردى. كوكتەم كوك كويلەگىن كيىپ الىپتى. بۇرشىك جارعان ورماندى القاپتاردىڭ ساۋكەلەسى توگىلىپ تۇر.
قارا شاڭىراقتا وتىرعان كەلىنگە قولقا سالعانبىز. ءوتىنىشىمىزدىڭ ورايى – بيە ساۋ. باياعىدا بالا كەزىمىزدە اۋىلداعى ءار ءۇيدىڭ بوساعاسىندا حوش ءيىسى اڭقىعان كۇبى تۇرۋشى ەدى. قازىر نەكەن-ساياق.
– ءۇش بيە ق ۇلىندادى, – دەدى ىنىشەك, – ءبارىن ساۋساق وزىمىزگە دە, سەندەرگە دە جەتەدى. تەك قور تابا الماي وتىرمىز.
ءيا, قور كەرەك-اق. بۇرىن بولعان. قازىر ىلكىدەگى ءۇردىس ۇزىلگەن. اق اجەمنىڭ الەۋەتتى شارۋاسى ويعا ورالعانى. اجەم الدەبىر ءاندى ىڭىلداپ ءجۇرىپ, جاڭا ساۋىلعان بيەنىڭ ءسۇتىن كىر شالماعان تاپ-تازا سۇزگىدەن وتكىزىپ, جىپ-جىلى كەزىندە كۇبىدەگى قوردىڭ ۇستىنەن قۇياتىن. سودان سوڭ مىندەتتى تۇردە وتىز- قىرىق مينۋت ءپىسىپ, اۋزىن بۇركەمەلەپ, قىمتاپ قوياتىن. ۇيدەگى بالالار كۇبىنى ارقايسىمىز ساناپ ءپىسىپ, مەن جۇزگە, مەن ەكى جۇزگە جەتكىزدىم دەپ ءبىر-بىرىمىزگە ماقتاناتىنبىز. العاش رەت قىمىز اشىتاردا بيەنىڭ ءسۇتى ارنايى اشىتقىنىڭ نەمەسە قوردىڭ ۇستىنە قۇيىلاتىن. اشىتقىنى ادەتتە ءسۇر جايانىڭ, قازىنىڭ سىنىق-سۇيەمىن سالىپ سۇتتەن, ول بولماسا سۇتكە نان اشىتقىسىن ەزىپ ازىرلەيتىن. قور دەگەنىمىزدىڭ ءوزى – ەسكى, بۇرىنعى قىمىز. قازاقتا كونە زاماننان بۇرىن كەلە جاتقان «قورى ۇزىلمەگەن» دەگەن استارىنا كوپ ماعىنا سياتىن ءسوز تىركەسى بار. بۇل ارادا جالعىز قىمىزدىڭ قورى ايتىلماسا كەرەك, ونداعى ايتپاق ويدىڭ ۇشىعى قورلى, قوردالى شاڭىراق ءوزىنىڭ ءاربىر ىسىنە ۇقىپتى, تىڭعىلىقتى وتباسى دەگەن ۇعىمدى بىلدىرسە كەرەك-ءتى. قوردىڭ ۇزىلمەۋى كۇندەلىكتى تىرشىلىكتە ءبىر-بىرىنە ساباقتاسىپ جاتاتىن قات-قابات شارۋانىڭ رەت-رەتىمەن اتقارىلۋىنا قاجەتتى تۇرمىستىق جايلاردىڭ ءوزارا جاراسىم تابۋى. سارى قىمىز قاشان دا ادام اعزاسىنداعى سان الۋان دەرتكە شيپا, دەنەگە كۇش قۇياتىن قاستەرلى, قۇدىرەتتى تاعام بولىپ سانالادى. قىمىزدىڭ ەرەكشە ءدامدى, ايرىقشا قۇنارلى, جان سارايىڭدى اشىپ, ءسىڭىمدى كەلەتىندىگى. جىلقى – جاراتىلىسىنان وتە كىرپياز ت ۇلىك. ول مىڭ سان ءشوپ وسەتىن جايىلىمنان تەك اسىلىن عانا تەرىپ جەيدى, سۋدى جالداپ ءجۇرىپ تۇنىعىن عانا ىشەدى. وسىنىڭ ءبارى اينالىپ كەلگەندە بيە ءسۇتىنىڭ قۇنارىن وزگە ءتورت ت ۇلىك مالدىڭ سۇتىنەن الدەقايدا ارتىعىراق ەتىپ تۇرادى.
وتكەننىڭ ەسكى ەلەسى كوڭىل تەبىرەنتتى. قايران اۋىلدىڭ قورى ۇزىلمەسىنشى. قىمىزدىڭ عانا ەمەس, قىرۋار قازاقى شارۋانىڭ دەپ تىلەدىك.