25 مامىر كۇنى ەلوردادا «استانا – ەسىرتكىسىز قالا» ۇرانىمەن جاپپاي ۆەلوشەرۋ ۇيىمداستىرىلادى. ۆەلوشەرۋگە قاتىسۋشىلار 25 شاقىرىمدى ەڭسەرۋى ءتيىس, دەپ جازادى Egemen.kz.
شارا قوسشى باعىتى بويىنداعى اينالما ۆەلوجولدان باستالىپ, يلينكا (ۇركەر) تۇرعىن الابىنداعى «جاسىل بەلدەۋ» ساياباعىندا مارەسىنە جەتەدى.
ۆەلوشەرۋگە 25 مامىردا ساعات 07:30-دان 09:00-گە دەيىن تىركەلۋگە بولادى. نەگىزگى ءبولىم 09:00-دە باستالادى. قاتىسۋ تەگىن. باستىسى, ءاربىر قاتىسۋشى ءوز ۆەلوسيپەدىمەن كەلۋى ءتيىس.
«بۇل – بارشاعا ارنالعان مەرەكەلىك ۆەلوشەرۋ. جاس ەرەكشەلىگىنە ەشقانداي شەكتەۋ جوق. قاتىسۋشىلار تەك تىركەۋ كەزىندە مەديتسينالىق انىقتاما ۇسىنۋى قاجەت. بۇل – باستى تالاپتاردىڭ ءبىرى. ەلوردا تۇرعىندارى مەن قوناقتارىن بەلسەندى قاتىسۋعا شاقىرامىز. ۆەلوشەرۋ – سالاۋاتتى ءومىر سالتىن ناسيحاتتايتىن, كوتەرىڭكى كوڭىل-كۇي سىيلايتىن ەرەكشە وقيعا بولماق», دەدى دەنە شىنىقتىرۋ جانە سپورت باسقارماسىنىڭ ءباسپاسوز حاتشىسى ءمادينا ايتقاليەۆا.
ۇيىمداستىرۋشىلار ۆەلوشەرۋ سوڭىندا تىركەلگەن قاتىسۋشىلار اراسىندا لوتەرەيا ۇيىمداستىرىپ, باعالى سىيلىقتار ويناتىلاتىنىن حابارلادى.