اقتوبە. 6 مامىر. اقتوبەدە ۇلى جەڭىستىڭ 70 جىلدىعى جانە 7 مامىر – وتان قورعاۋشىلار كۇنى قارساڭىندا قازاقستاننىڭ تۇڭعىش پرەزيدەنتى نۇرسۇلتان نازارباەۆ اتىنداعى ورتالىق مادەنيەت جانە دەمالىس ساياباعىندا «اسكەرگە شاقىرۋشىلار كۇنى» وتكىزىلدى. شاراعا ۇلى وتان سوعىسىنىڭ ارداگەرلەرى, تىل ەڭبەككەرلەرى, اسكەرگە شاقىرۋشىلاردىڭ اتا-انالارى, اۋعان جانە لوكالدى سوعىستاردىڭ ارداگەرلەرى, اسكەري قىزمەتشىلەر, كۋرسانتتار, ستۋدەنتتەر, مەكتەپ وقۋشىلارى جانە پاتريوتتىق كلۋبتاردىڭ مۇشەلەرى قاتىستى. بۇل تۋرالى egemen.kz ءتىلشىسى حابارلادى.
وبلىس اكىمى ارحيمەد مۇحامبەتوۆ ءسوز سويلەپ, جينالعانداردى الدا كەلە جاتقان مەرەيلى مەرەكەلەرمەن قۇتتىقتادى. ەگەمەندى ەلىمىزدىڭ قارۋلى كۇشتەرىنىڭ قۋاتتىلىعىنا توقتالا كەلىپ, تمد ەلدەرىنىڭ اراسىندا الدىڭعى قاتاردا ەكەنىن اتاپ ءوتتى. وعان اقتوبەلىكتەردىڭ وزىندىك ۇلەس قوسىپ كەلە جاتقانىن, تەك تاۋەلسىزدىك العاننان بەرگى ۋاقىتتا 16 مىڭنان استام اقتوبەلىك اسكەر قاتارىندا بولعانىن, ال, بيىل 2 مىڭنان استام جاستاردىڭ اسكەر قاتارىنا شاقىرىلىپ وتىرعانىن جەتكىزدى. ۇلى وتان سوعىسىنىڭ ارداگەرى اندرەي اندرەەۆ پەن وبلىستىق قورعانىس ىستەرى دەپارتامەنتىنىڭ باسشىسى, پولكوۆنيك عالىمجان ءجانتورين اسكەرگە اتتانۋشىلارعا اق جول تىلەدى.
اسكەرگە شاقىرىلعاندار اتىنان ءسوز العان دانيار عالىمجانوۆ اعا ۇرپاقتىڭ ەرلىك ىستەرىنە ادال بولاتىندارىن, اسكەردە جاقسى قىزمەت ەتىپ, اقتوبەلىكتەردى ۇياتقا قالدىرمايتىندارىنا سەندىردى.
اقتوبەلىك ساربازدار «باتىس» ايماقتىق №41433 اسكەري بولىمدە وتان الدىنداعى بورىشتارىن وتەيتىن بولادى.
شارا اياسىندا ۇلى وتان سوعىسىنىڭ ارداگەرلەرى مەن اسكەرگە اتتانۋشىلارعا ەستەلىك سىيلىقتار تابىستالدى.
ساتىبالدى ءساۋىرباي.
دەرەك: egemen.kz.
سۋرەت: حايرەدين راۋشانوۆ.