يتاليانىڭ تۋرين قالاسىندا وتكەن «چەلەندجەر» تۋرنيردە باس جۇلدەنى ولجالاعاننان كەيىن قازاقستاننىڭ ەڭ ۇزدىك تەننيسشىسى الەكساندر بۋبليك اتر رەيتينگىندە بىردەن 25 ساتىعا جوعارلاپ, قازىرگى كەزدە ول 51 ورىندى يەلەنۋدە.
ەلىمىزدىڭ ەكىنشى راكەتكاسى الەكساندر شەۆچەنكو 97 ورىندى ەنشىلەۋدە. ەرلەر اراسىندا ايتاليالىق ياننيك سيننەر كوش باستاپ تۇر. ەكىنشى جانە ءۇشىنشى ورىنداردى يسپانيالىق كارلوس الكاراس پەن گەرمانيالىق الەكساندر زۆەرەۆ ءوزارا بولىسۋدە. سونداي-اق, توپ-10 ويىنشىنىڭ قاتارىنا تەيلور فريتس (اقش), دجەك درەيپەر ( ۇلىبريتانيا), نوۆاك دجوكوۆيچ (سەربيا), لورەنتسو مۋزەتتي (يتاليا), كاسپەر رۋد (نورۆەگيا), الەكس دە مينۋار (اۋستراليا) جانە حولگەر رۋنە (دانيا) ەنىپ وتىر.
WTA رەيتينگىندە بەلارۋستىك ارينا سوبولەنكو الدىنا جان سالمار ەمەس. ونى اقش-تىڭ قوس وكىلى كوري گاۋفف پەن دجەسسيكا پەگۋلا وكشەلەپ كەلەدى. سونىمەن قاتار, ۇزدىك وندىقتىڭ قاتارىندا جاسمين پاوليني (يتاليا), يگا سۆەنتەك (يتاليا), ميررا اندرەەۆا (رەسەي), چجەن تسينۆەن (قىتاي), مەديسون كيز (اقش), ەمما ناۆاررو (اقش) جانە پاۋلا بادوسا (يسپانيا) بار. قازاقستاننىڭ ەڭ ۇزدىك تەننيسشىسى ەلەنا رىباكينا 12 ورىندى قاناعات تۇتسا, يۋليا پۋتينتسەۆا 31 ساتىعا جايعاستى.
سونداي-اق, جاپونياداعى جەڭىسىنەن كەيىن زارينا دياستىڭ دا جاعدايى ءبىرشاما جاقسارعانىن ايتا كەتۋگە ءتيىسپىز. كۇن شىعىس ەلىندە باس جۇلدەنى ولجالاعان جەرلەسىمىز بىردەن 43 ساتىعا جوعارلاپ, بۇل كۇندەرى 275 ورىنعا تابان تىرەپ تۇر.