بۇگىن ورتالىق كوممۋنيكاتسيا قىزمەتىنىڭ الاڭىندا وتكەن بريفينگتە وقۋ-اعارتۋ ءمينيسترى عاني بەيسەمباەۆ مەملەكەت باسشىسى ۇسىنعان «جايلى مەكتەپ» جوباسىنىڭ ەرەكشەلىكتەرى تۋرالى ايتتى, دەپ جازادى Egemen.kz.
بۇل — زاماناۋي وقىتۋ ستاندارتتارىنا ساي بىرىڭعاي ءبىلىم بەرۋ كەڭىستىگىن قۇرۋ ارقىلى ەلدەگى ورتا ءبىلىم دەڭگەيىن جۇيەلى تۇردە ارتتىرۋعا باعىتتالعان ستراتەگيالىق باستاما. جوبا قالا مەن اۋىل مەكتەپتەرى اراسىنداعى الشاقتىقتى جويۋعا باعىتتالعان. مينيستر جوبانى ىسكە اسىرۋدىڭ ماقساتى – ەليتالىق وقۋ ورىندارىن قۇرۋ ەمەس, ءبىلىم بەرۋ ساپاسىنىڭ جوعارى ستاندارتتارىن جاپپاي ەنگىزۋ ەكەنىنە نازار اۋداردى. «جايلى مەكتەپ» اربىر بالاعا تولىققاندى دامۋعا جانە ءوز الەۋەتىن اشۋعا تەڭ مۇمكىندىك بەرەدى.
«مەكتەپتەردىڭ زاماناۋي تەحنيكالىق جاراقتاندىرىلۋى XXI عاسىر داعدىلارىن قالىپتاستىرۋعا قولايلى ورتا جاسايدى. بۇعان اناليتيكالىق ويلاۋ مەن IT-قۇزىرەتتەردەن باستاپ, زەرتتەۋشىلىك جانە شىعارماشىلىق قابىلەتتەردى دامىتۋعا دەيىنگى باعىتتار كىرەدى. ءبىلىم بەرۋ مودەلىنىڭ ەرەكشەلىگى – تەوريالىق دايىندىق پەن زاماناۋي جابدىقتالعان زەرتحانالار مەن شەبەرحانالارداعى پراكتيكالىق جۇمىستاردىڭ ۇيلەسىمدى ۇشتاسۋىندا. مۇعالىمدەر وقۋشىلاردىڭ ەرەكشە قابىلەتتەرىن اشۋعا مۇمكىندىك بەرەتىن توپتىق جوبالاردان باستاپ ينتەراكتيۆتى ادىستەرگە دەيىنگى وزىق پەداگوگيكالىق تاسىلدەردى قولدانادى», دەدى عاني بەيسەمباەۆ.
سونداي-اق مينيستر ەندى بۇل ستراتەگيالىق جوبانىڭ «كەلەشەك مەكتەپتەرى» دەپ اتالاتىنىن ايتتى. مينيستر جوبا وڭىرلىك ەكونوميكانى بىرنەشە باعىتتا ىنتالاندىراتىنىن دا اتاپ ءوتتى.
«بىرىنشىدەن, مەكتەپ قۇرىلىستارىنا جەرگىلىكتى قۇرىلىس كومپانيالارى مەن جۇمىسشى بريگادالار تارتىلادى, بۇل – جاڭا جۇمىس ورىندارىنىڭ قۇرىلۋىنا تىكەلەي اسەر ەتەدى. ەكىنشىدەن, ءار جاڭا مەكتەپ پەداگوگتەر مەن تەحنيكالىق قىزمەتكەرلەر ءۇشىن جاڭا جۇمىس ورىندارىنىڭ اشىلۋى. جالپى العاندا, ەلىمىز بويىنشا بارلىق جاڭا مەكتەپتەردى كادرمەن قامتاماسىز ەتۋ ءۇشىن 2026 جىلعا دەيىن 30 مىڭنان استام جاڭا مۇعالىم قاجەت بولادى. بۇدان بولەك, زاماناۋي مەكتەپتىڭ اشىلۋى ەلدى مەكەننىڭ تارتىمدىلىعىن ارتتىرادى: وڭىرگە جاس ماماندار كەلەدى, وتباسىلار قالاعا كوشۋدى ازايتادى, مەكتەپتىڭ اينالاسىندا ينفراقۇرىلىم داميدى. جوبا مۋلتيپليكاتيۆتى اسەر بەرەدى – بۇل تەك جۇمىسپەن قامتۋ عانا ەمەس, سونىمەن قاتار وڭىرلەردە ادام كاپيتالىنا باعىتتالعان ۇزاق مەرزىمدى ينۆەستيتسيا», دەدى وقۋ-اعارتۋ ءمينيسترى.