الماتىداعى «عىلىم ورداسىنىڭ» قىزمەتكەرلەرى تەگەرانعا ساپارى بارىسىندا عىلىمي, مادەني جانە ارحيۆ سالالارىنداعى ءوزارا سەرىكتەستىكتى نىعايتۋعا ارنالعان ىنتىماقتاستىق كەزدەسۋلەرىن وتكىزدى.
«عىلىم ورداسى» رەسپۋبليكالىق مەملەكەتتىك كاسىپورنىنىڭ باس ديرەكتورى ۇلار مۇقاجانوۆ باستاعان دەلەگاتسيا يران يسلام رەسپۋبليكاسىنىڭ استاناسى – تەگەران قالاسىنداعى مالەك ۇلتتىق مۋزەيى مەن كىتاپحاناسىنا ات باسىن بۇردى. 1937 جىلى قاجى حۋسەين مالەك نەگىزىن قالانعان بۇل مەكەمە بۇگىندە قۇدس رازاۆي ورتالىعىنا قارايدى. مۋزەي مەن كىتاپحانا سيرەك قولجازبالار مەن تاريحي جادىگەرلەردىڭ باي قورىنا يە. ساپار بارىسىندا دەلەگاتسيا مۇشەلەرى مۋزەيدىڭ قۇرىلىمى, كىتاپ قويماسى جانە زەرتحاناسىمەن تانىسىپ, الداعى ۋاقىتتا بىرلەسكەن ءىس-شارالار ۇيىمداستىرۋ ماسەلەلەرى بويىنشا كەلىسىمگە كەلدى.
سونداي-اق يسلام مادەنيەتى جانە قارىم-قاتىناس ۇيىمىندا بولىپ, عىلىمي, مادەني جانە ءبىلىم بەرۋ سالالارىنداعى ىنتىماقتاستىق پەن بىرلەسكەن جوبالاردى تالقىلاپ, مادەني جانە عىلىمي قارىم-قاتىناستاردى ودان ءارى كەڭەيتۋ ماسەلەلەرىن قاراستىردى.
ساپار اياسىندا سونىمەن بىرگە دەلەگاتسيا مۇشەلەرى تسيفرلاندىرۋ مەن رەستاۆراتسيا سالاسىندا مول تاجىريبەگە يە «نۋر» حالىقارالىق ميكروفيلمدەر ورتالىعى جۇمىسىمەن تانىستى. تاراپتار رەستاۆراتسيا جانە كونسەرۆاتسيا سالاسىنداعى دايىندىق كۋرستارىن ۇيىمداستىرۋ, كوديكولوگيالىق زەرتتەۋلەر جۇرگىزۋ, سونداي-اق الماتىدا ىنتىماقتاستىق مەموراندۋمىنا قول قويۋعا ۋاعدالاستى.
الماتى