ومىرگە كەلگەن ساتىڭنەن باستاپ, تۋعان جەرىڭ ساعان التىن بەسىك-اتامەكەن بولىپ سانالاتىنى ءسوزسىز. ول مەكەن – اكە-شەشەڭنىڭ, اتا-اجەڭنىڭ, ارعى اتا-بابالارىڭنىڭ, سەنەن كەيىنگى ۇرپاقتاردىڭ قۇتتى قونىسى, مەكەنى. مەنىڭ تۋىپ-وسكەن جەرىم – سولتۇستىك قازاقستان وبلىسى ەسىل اۋدانىنداعى بۇلاق اۋىلى. باقىتتى بالالىق شاعىم وسى اۋىلدا ءوتتى. ۇلكەن قازاق اۋىلىندا جالعىز عانا ورىس وتباسى تۇردىق. «سەن ورىسسىڭ, ءبىز قازاقپىز» دەپ بولگەندەرىن ەشقاشان ەستىمەگەندىكتەن وتباسىمىزبەن ابدەن ءسىڭىپ كەتكەنىمىز شىندىق.
ەڭ الدىمەن بۇل اۋىلعا اتام مەن اجەم قونىس اۋدارعان, كەيىن وسى جەردىڭ توپىراعى بۇيىردى. كوز الدىما ۇنەمى سەنىم مەن سىيلاستىقتا ءومىر سۇرگەن اۋىل ادامدارى كەلەدى. ءالى ەسىمدە كورشىلەرىمىز تايمۋلليندەر, قوجاحمەتوۆتار, مۇقاشەۆتەر وتباسىلارى تۋعانىمىزداي جاقىن بولىپ كەتتى.
اۋىلدىڭ بالالارىمەن بىرگە قوي باعاتىنبىز. سونداعى دالا ءشوبىنىڭ حوش ءيىسى-اي! سول اياۋلى ساتتەردى ەسىمە السام كوزىمە ەرىكسىز جاس كەلەدى. جازدىڭ جايما شۋاق كۇندەرىندە باقىتگۇل جانە روزا دەگەن دوستارىممەن ءۇي ماڭايىنداعى كوگالعا كورپەمىزدى جايىپ, قۋىرشاق ويناساق, ىنىلەرىم دە وزدەرى شامالاس بالالارمەن دوپتىڭ قىزىعىنا ەنەتىن. بالالىق شاعىمىزداعى دوستارىمىزبەن ءالى كۇنگە دەيىن ارالاسىپ تۇرامىز.
تامىرلارىمىز, مارقۇم قايىرلى اعا مەن ساپۋرا تاتە قاشاعانوۆتار تۋرالى ەرەكشە ايتقىم كەلەدى. ولار اجەم ميليۋتينا اناستاسيامەن جاقىن دوس بولاتىن. بۇل وتباسىلىق دوستىق ءارى قاراي دا جالعاسىن تاۋىپ, ۇلدارى ساپار مەنىڭ اكە-شەشەممەن جەكجاتتىق بايلانىستا. ءالى كۇنگە دەيىن تۋىستىق, جاقىندىق ارا-قاتىناسىمىز ۇزىلگەن ەمەس. بۇل كىسىلەر ۇيدە ۇيىمداستىرىلاتىن مەرەكەلەرىمىزدىڭ سىيلى قوناعى.
اكەم ۆاسيلي كەزىندە «قازاقشا كۇرەس» سپورت ءتۇرىن جاقسى مەڭگەرگەن, سوۆحوزدا مەحانيزاتور بولىپ جۇمىس ىستەگەن اۋىلدىڭ سىيلى ادامى بولدى. انام ۆالەنتينا بىزگە باۋىرساق ءپىسىرىپ, ايران ۇيىتاتىن. انامنىڭ زامانداسى كۇمىس يمانبايروۆا ايران ۇيىتۋى ۇيرەتكەنى دە ەسىمدە. بۇگىنگە دەيىن كۇنىنە بىرنەشە رەت تەلەفون ارقىلى سويلەسىپ تۇراتىن, ءبىر-بىرىنە دەگەن سىيلاستىعى ۇزىلمەگەن ادال دوستار. جالپى اكە-شەشەم قازاق حالقىنىڭ سالت-داستۇرلەرىنە سىيلاستىقپەن قاراپ, ۇيرەنىپ قانا قويماي, ءبىزدىڭ دە بويىمىزعا سىڭىرە ءبىلدى. كورشىلەرمەن بىرگە سوعىم سويىپ, كىسىلەردى قۋىرداققا شاقىراتىنى ەسىمنەن كەتپەيدى. اۋىلداعى بالالارمەن بىرگە ويناپ, بىرگە ءجۇرىپ قازاق ء تىلىن ەركىن مەڭگەردىم. العاش قازاق مەكتەبىندە ساۋات اشتىم. ۇيدەگى مەنەن كىشى ءۇش ءىنىم دە قازاقشا تازا سويلەيدى. اتا-انام مەن تۋعان اۋىلىم مەنىڭ بويىما تىلگە, ەلگە دەگەن قۇرمەتتى سىڭىرە ءبىلدى. بۇگىنگى كۇنى مەكتەپتە قازاق ءتىلى مەن ادەبيەتى مۇعالىمىمىن. وسى جولدى تاڭداۋىما ءوز ءىسىنىڭ مامانى, قازاق ءتىلى مەن ادەبيەتىنەن ءتالىم العان ۇستازىم مۇحامەدجانوۆا گۇلساريا ەلەۋكەنقىزىنىڭ ىقپالى ەرەكشە بولدى. ءوزىم سياقتى بۇلاق اۋىلىنان شىققان ءارى ارىپتەسىم, ءارى قۇربىم تاتتىباەۆا ايجان بورانبايقىزى مەن اۋىلىمىزدىڭ كەلىنى وسپانوۆا بالعانىم ديۋسەنقىزى سياقتى قازاق ءتىلىنىڭ دامۋىنا ءوز ۇلەستەرىن قوسىپ جۇرگەن مۇعالىمدەرىنىڭ ەڭبەكتەرىن ەرەكشە باعالايمىن.
جالپى مەن ءۇشىن بۇلاق اۋىلىنىڭ ادامدارى ەرەكشە ىستىق. ەڭ باقىتتى, تازا, ۋايىم-قايعىسىز كەزدەرىمدى وسى اۋىلمەن بايلانىستىرامىن. ءجيى تۇسىمە كىرەدى.وسىنداي قازاق اۋىلىندا تۋىپ-وسكەنىمدى ماقتان تۇتامىن! مەملەكەتتىك ءتىلدى وسى دەڭگەيدە ۇيرەتكەنى ءۇشىن ەلىمە, جەرىمە العىسىم شەكسىز!
ليۋدميلا ميليۋتينا,
پەتروپاۆل قالاسى
№ 17 ۇلتتىق وركەندەۋ ورتا مەكتەبى
قازاق ءبولىمىنىڭ مۇعالىمى,
«Urpaq» قازاق مادەني-اعارتۋ ورتالىعى» قب مۇشەسى