2024 جىلدىڭ قورىتىندىسى بويىنشا قازاقستاندا جاڭارتىلاتىن ەنەرگيا كوزدەرىنەن (جەك) وندىرىلەتىن ەلەكتر ەنەرگياسىنىڭ ۇلەسى 6,43%-دى قۇراعان. بۇل كورسەتكىش 2020 جىلمەن سالىستىرعاندا ەكى ەسە جوعارى, سول جىلى جەك ۇلەسى نەبارى 3% بولعان, دەپ حابارلايدى Egemen.kz.
ەنەرگەتيكا مينيسترلىگىنىڭ حابارلاۋىنشا, جەك سەكتورىنداعى دامۋ – ينۆەستيتسيالىق احۋالدى جاقسارتۋعا باعىتتالعان تۇراقتى مەملەكەتتىك قولداۋدىڭ ناتيجەسى. جاڭا نىسانداردىڭ قۇرىلىسى نەگىزىنەن جەكە ينۆەستورلاردىڭ قارجىسى ەسەبىنەن جۇزەگە اسىرىلىپ جاتىر, ال حالىقارالىق وزىق تاجىريبەلەر بەلسەندى تۇردە ەنگىزىلەدى.
ايتا كەتەيىك, مۇنداي ءوسىم ەلدەگى «جاسىل» ەكونوميكاعا كوشۋ باعىتىنداعى مەملەكەتتىك ساياساتتىڭ ءساتتى جۇزەگە اسىپ جاتقانىن كورسەتەدى.
سوڭعى بەس جىلداعى ءوسىم ديناميكاسى:
2021 ج. – 3,69%; 2022 ج. – 4,53%; 2023 ج. – 5,92%; 2024 ج. – 6,43%.قازىرگى تاڭدا ەلىمىزدە 154 جاڭارتىلاتىن ەنەرگيا نىسانى جۇمىس ىستەيدى, ولاردىڭ جالپى قۋاتى 3 گۆت-تان اسادى. اتاپ ايتقاندا:
63 جەل ەلەكتر ستانتسياسى (1 570,05 مۆت); 46 كۇن ەلەكتر ستانتسياسى (1 222,61 مۆت); 42 سۋ ەلەكتر ستانتسياسى (287,685 مۆت); 3 بيوگاز ستانتسياسى (1,77 مۆت).