ۇكىمەت وتىرىسىندا دەنساۋلىق ساقتاۋ ءمينيسترى اقمارال ءالنازاروۆا ءبىلىم بەرۋ ۇيىمدارىنا ارنالعان تاماقتانۋدىڭ جاڭا ستاندارتى مەن ۇلگىلىك پەرسپەكتيۆالىق ءمازىردى تانىستىردى. بۇل قۇجاتتار پرەمەر-مينيستر ولجاس بەكتەنوۆتىڭ تاپسىرماسى بويىنشا ازىرلەنگەن جانە 2025 جىلعى 1 قىركۇيەكتەن باستاپ ەنگىزىلەدى, دەپ حابارلايدى Egemen.kz.
ءمينيستردىڭ ايتۋىنشا, جاڭا ستاندارت حالىقارالىق ۇسىنىمدارعا نەگىزدەلگەن جانە بالالاردىڭ دۇرىس تاماقتانۋىن قامتاماسىز ەتۋگە باعىتتالعان. اتاپ ايتقاندا, مازىردە قانت مولشەرى 3,6 ەسەگە, ال تۇز 5 ەسەگە دەيىن ازايتىلادى. بۇل وزگەرىستەر سەمىزدىك, قانت ديابەتى, جۇرەك-قان تامىرلارى سەكىلدى سوزىلمالى اۋرۋلاردىڭ دامۋ قاۋپىن تومەندەتۋگە ىقپال ەتەدى.
جاڭا نورمالار بويىنشا:
بالالار اراسىنداعى سەمىزدىك كورسەتكىشى 15%-عا; قانت ديابەتى – 20%-عا; گيپەرتونيا – 18%-عا; باسقا دا ينفەكتسيالىق ەمەس اۋرۋلار 15%-عا دەيىن ازايادى دەپ كۇتىلەدى.سونىمەن قاتار, ستاندارتتا شاعىن جيناقتى مەكتەپتەر ءۇشىن ارنايى ءمازىر, سونداي-اق مەكتەپ تاعامدارىنا وقۋشىلاردىڭ قاناعاتتانۋ دەڭگەيىن باعالاۋعا مۇمكىندىك بەرەتىن «جەۋگە جارامسىزدىق يندەكسى» ۇعىمى العاش رەت ەنگىزىلگەن. بۇل كورسەتكىش وقۋشىلار تۇتىنباعان تاعام قالدىقتارى ارقىلى ەسەپتەلەدى.
جاڭا تاماقتانۋ ءتارتىبى مەكتەپتەر مەن مەكتەپكە دەيىنگى ۇيىمدارعا بىردەي قولدانىلادى جانە وقۋشىلاردىڭ دەنساۋلىعىن ساقتاۋعا باعىتتالعان كەشەندى شارالاردىڭ ءبىر بولىگى.