ۋكراينا پرەزيدەنتى ۆلاديمير زەلەنسكي اقش پرەزيدەنتى دونالد ترامپ جانە رەسەي پرەزيدەنتى ۆلاديمير پۋتينمەن تەلەفون ارقىلى سويلەسكەننەن كەيىن كيەۆتىڭ حالىقارالىق كەزدەسۋ ۇيىمداستىرۋ مۇمكىندىگىن قاراستىرىپ جاتقانىن مالىمدەدى, دەپ حابارلايدى Egemen.kz.
زەلەنسكيدىڭ ايتۋىنشا, كەلىسسوزدەر تۇركيا, ۆاتيكان نەمەسە شۆەيتساريادا ءوتۋى مۇمكىن. ول بۇل تۋرالى بريفينگ بارىسىندا بايانداعان.
سونداي-اق ۋكراينا باسشىسى ەلدىڭ ماسكەۋ قويعان تالاپتارعا كەلىسپەيتىنىن, اتاپ ايتقاندا, ءوز اۋماعىنان اسكەرىن شىعارمايتىنىن جانە رەسەيلىك ۋلتيماتۋمداردى قابىلدامايتىنىن ناقتى جەتكىزگەن.
زەلەنسكي ترامپپەن ءبىر كۇندە ەكى مارتە سويلەسكەنىن اتاپ ءوتتى. العاشقى قوڭىراۋ بارىسىندا اتىستى توقتاتۋ ماسەلەسى جانە رەسەي ونى بۇزعان جاعدايدا اقش-تىڭ جاڭا سانكتسيالارعا دايىن ەكەندىگى تالقىلانعان. ەكىنشى رەت سويلەسكەندە زەلەنسكيمەن بىرگە ەۋروپالىق ەلدەردىڭ كوشباسشىلارى دا بايلانىسقا قوسىلعان.
«ەگەر رەسەي اتىستى توقتاتۋدان باس تارتسا, تۇتقىندار مەن كەپىلگە الىنعانداردى بوساتپاسا جانە قيسىنسىز تالاپتار قويسا, بۇل كرەملدىڭ سوعىستى جالعاستىرۋعا مۇددەلى ەكەنىن كورسەتەدى. مۇنداي جاعدايدا حالىقارالىق قاۋىمداستىق, اسىرەسە ەۋروپا مەن امەريكا, قوسىمشا سانكتسيالارمەن جاۋاپ بەرۋى كەرەك», دەلىنگەن Telegram-ارنادا جازىلعان اقپاراتتا.
ءوز كەزەگىندە رەسەي پرەزيدەنتى ۆلاديمير پۋتين ۋكراينامەن ءتيىستى كەلىسىمدەر جاسالعان جاعدايدا اتىستى توقتاتۋعا دايىن ەكەنىن بىلدىرگەن. ال اقش پرەزيدەنتى دونالد ترامپ تاراپتاردى سوعىس تۋرالى كەلىسسوزدەردى مۇمكىندىگىنشە تەز باستاۋعا شاقىرعان.