ەلوردا تورىندە مادەنيەت قىزمەتكەرلەرىنىڭ كاسىبي مەرەكەسىنە ارنالعان فورۋم سالتاناتتى تۇردە اشىلدى. ءۇش كۇنگە جوسپارلانعان القالى جيىن ەلىمىزدىڭ مادەنيەت پەن ونەر سالاسىنداعى وزەكتى ماسەلەلەردى ورتاعا سالىپ, ورتاق مۇراتتاردى جۇيەلەۋگە باعىتتالعان, دەپ جازادى Egemen.kz.
اۋقىمدى ءىس-شاراعا مۋزەي, تەاتر, كىتاپحانا, ارحيۆ, مادەني-دەمالىس مەكەمەلەرىنىڭ جەتەكشىلەرى مەن سالا ماماندارى جينالىپ, سالانى دامىتۋدىڭ ءتيىمدى تەتىكتەرىن تالقىلاپ جاتىر. فورۋم اياسىندا ءبىر مەزەتتە بىرنەشە الاڭدا پانەلدىك سەسسيالار ۇيىمداستىرىلىپ, قاتىسۋشىلاردىڭ ۇسىنىس-پىكىرلەرى نازارعا الىندى.
اتاپ ايتقاندا, ۇلتتىق مۋزەي قابىرعاسىندا III قازاقستاندىق مۋزەيلەر كونگرەسى ءوز جۇمىسىن باستادى. بۇل جولعى جيىن تاريحي-مادەني مۇرانى ساقتاۋ ماسەلەسىنە ارنالدى. ساراپشىلار تەوريالىق ۇستانىمدارمەن قاتار, پراكتيكالىق تاجىريبە الماسۋعا دا دەن قويىپ وتىر. قاتىسۋشىلار ەكسپوناتتاردى رەستاۆراتسيالاۋ مەن كونسەرۆاتسيالاۋ ىسىندەگى جەتىستىكتەرمەن تانىسىپ, ارحەولوگيالىق ارتەفاكتىلەردى ساقتاۋ جونىندەگى شەبەرلىك ساباعىنا قاتىستى.
سونداي-اق ساحنا ونەرى سالاسىنىڭ وكىلدەرى دە شىعارماشىلىق الاڭداردا باس قوستى. كونتسەرتتىك ۇيىمدار مەن مادەني-دەمالىس ورتالىقتارىنىڭ قىزمەتكەرلەرى رەجيسسۋراداعى جاڭا باعىتتار, ساحنالىق شەبەرلىك, پروديۋسەرلىك جانە كوستيۋم ونەرىنە ارنالعان دوڭگەلەك ۇستەلدەر مەن تاجىريبەلىك زەرتحانالارعا قاتىسىپ, كاسىبي بىلىكتىلىكتەرىن شىڭدادى.
وڭىرلىك كىتاپحانالاردىڭ باسشىلارى مەن كىتاپحاناشىلار دا بۇگىنگى زامان تالابىنا ساي قىزمەت تۇرلەرىن جەتىلدىرۋ, تسيفرلىق تەحنولوگيالاردى ەنگىزۋ تاجىريبەسىن ورتاعا سالدى. كۇن تارتىبىندە جاساندى ينتەللەكتتى قولدانۋ, قۇجاتتىق مۇرالاردى ساقتاۋدىڭ جاڭا تاسىلدەرى تالقىلاندى.
فورۋم اياسىندا «رۋحاني قازىنا – 2025» رەسپۋبليكالىق مادەنيەت جانە ونەر ۇيىمدارى مەن قىزمەتكەرلەرىنىڭ فەستيۆالى باستالدى. مادەنيەت سالاسىنىڭ مارتەبەسىن كوتەرۋدى ماقسات تۇتقان بايقاۋعا 85 كىتاپحانا, 50 مادەنيەت ءۇيى جانە 30 مۋزەي قاتىسۋعا ءوتىنىم بىلدىرگەن. قۇرامىندا كاسىبي ماماندار بار قازىلار القاسى 19 نوميناتسيا بويىنشا ۇزدىكتەردى انىقتاپ, جەڭىمپازداردى ماراپاتتايدى.