2025 جىلعى 19 مامىردا استانادا مادەنيەت قىزمەتكەرلەرى فورۋمىنىڭ اشىلۋى بولىپ ءوتتى. ءىس-شارا مادەنيەت جانە ونەر قايراتكەرلەرىنىڭ كاسىبي مەرەكەسىنە ارنالدى.
الداعى ءۇش كۇن بويى مۋزەيلەردىڭ, تەاترلاردىڭ, كىتاپحانالاردىڭ, ارحيۆتەردىڭ جانە مادەني-دەمالىس مەكەمەلەرىنىڭ باسشىلارى مەن قىزمەتكەرلەرى سالانى دامىتۋعا باعىتتالعان وزەكتى ماسەلەلەردى تالقىلاپ, ۇسىنىستار ازىرلەيدى.
پانەلدىك سەسسيالار ءبىر مەزەتتە بىرنەشە الاڭدا وتۋدە. ماسەلەن, ۇلتتىق مۋزەيدە III قازاقستاندىق مۋزەي كونگرەسىنىڭ اشىلۋى بولىپ ءوتتى. ونىڭ نەگىزگى تاقىرىبى – تاريحي-مادەني مۇرانى ساقتاۋ. جيىندا ساراپشىلار تەوريامەن قاتار پراكتيكالىق ماسەلەلەرگە دە نازار اۋداردى. قاتىسۋشىلار ەكسپوناتتاردى كونسەرۆاتسيالاۋ مەن رەستاۆراتسيالاۋداعى باستى جەتىستىكتەرمەن تانىسىپ, ارحەولوگيالىق ارتەفاكتىلەردى ساقتاۋ بويىنشا شەبەرلىك ساباعىنا قاتىستى.
وسى ۋاقىتتا كونتسەرتتىك جانە مادەني-دەمالىس ۇيىمدارىنىڭ وكىلدەرى ساحنا شەبەرلىگى, رەجيسسۋراداعى يننوۆاتسيالارعا, پروديۋسەرلىككە جانە كوستيۋموگرافياعا ارنالعان دوڭگەلەك ۇستەلدەرگە, شىعارماشىلىق زەرتحانالار مەن ماستەر-كلاسستارعا قاتىستى.
وڭىرلىك كىتاپحانالاردىڭ باسشىلارى مەن ماماندارى دا باس قوستى. ولار دامۋدىڭ زاماناۋي ستراتەگيالارىن, تسيفرلىق تەحنولوگيالاردى قولدانۋ تاجىريبەسىن تالقىلادى. كۇن تارتىبىندە جاساندى ينتەللەكتتى پايدالانۋ جانە قۇجاتتىق مۇرانى ساقتاۋ سەكىلدى ماسەلەلەر قوزعالدى.
فورۋم اياسىندا «رۋحاني قازىنا – 2025» مادەنيەت جانە ونەر ۇيىمدارى مەن قىزمەتكەرلەرىنىڭ رەسپۋبليكالىق فەستيۆالى اشىلدى. وعان قاتىسۋ ءۇشىن 85 كىتاپحانا, 50 مادەني-دەمالىس ۇيىمى جانە 30 مۋزەي ءوتىنىم بەردى. قۇرامىندا كاسىبي ماماندار بار قازىلار القاسى ءاربىر ءوتىنىمدى قاراپ, 19 نوميناتسيا بويىنشا جەڭىمپازداردى انىقتايدى.