ونىمدىلىگى شامامەن 2 ەكزافلوپستى قۇرايتىن سۋپەركومپيۋتەر ورتالىق ازيا تاريحىنداعى العاشقى سۋپەركومپيۋتەرلىك كلاستەر. تسيفرلىق دامۋ مينيسترلىگى ول جاساندى ينتەللەكت پەن جوعارى ءونىمدى ەسەپتەۋلەرگە ارنايى جاسالعان NVIDIA H200 جاڭا گرافيكالىق چيپتەرىنىڭ نەگىزىندە جيناقتالعانىن مالىمدەدى, دەپ جازادى Egemen.kz.
سۋپەركومپيۋتەردى ورناتۋ جانە ىسكە قوسىپ, ۇزدىكسىز ءارى تۇراقتى جۇمىسىن قامتاماسىز ەتۋ ءۇشىن Tier III سەنىمدىلىك دەڭگەيىندەگى ءتسدياوم-ءتىڭ جاڭا دەرەكتەر ورتالىعىندا جۇزەگە اسىرىلادى.
بۇل باستاما تەك ماماندار شەڭبەرىنە عانا ەمەس, بۇكىل ەلدىڭ تسيفرلىق ەكوجۇيەسىن دامىتۋعا باعىتتالعان. مۇنداي قۋاتتىلىق بۇگىندە دەنساۋلىق ساقتاۋ, ەنەرگەتيكا, ءبىلىم بەرۋ جانە مەملەكەتتىك قىزمەتتەر سياقتى بارلىق سالادا قولدانىلىپ جاتىر.
سۋپەركومپيۋتەر رەسۋرستارى بارشاعا قولجەتىمدى بولادى. ولارعا نەيروندىق جەلىلەردى وقىتۋ ءۇشىن ەسەپتەۋ قۋاتى قاجەت ستارتاپتار, ىرگەلى جانە قولدانبالى زەرتتەۋلەر جۇرگىزەتىن ۋنيۆەرسيتەتتەر, سونداي-اق جاساندى ينتەللەكتتى بيزنەس-پروتسەستەرگە ەنگىزىپ جاتقان عىلىمي ورتالىقتار مەن كومپانيالار قوسىلا الادى.
سۋپەركومپيۋتەردىڭ جەتكىزىلۋى قازاقستاندا جوعارى ءونىمدى ەسەپتەۋلەر ەكوجۇيەسىن دامىتۋعا جول اشىپ وتىر. وسىنىڭ اياسىندا قازاقستان العاش رەت جوعارى تەحنولوگيالىق جابدىقتى كەدەندىك باج بەن ققس-تان بوساتۋ مەحانيزمىن قۇردى. بۇل ەلىمىزدى حالىقارالىق IT-كومپانيالار مەن دەرەكتەر ورتالىعى وپەراتورلارى ءۇشىن الدەقايدا تارتىمدى ەتەدى.
ايتا كەتەيىك, ابۋ-ءدابيدىڭ تاق مۇراگەرى شەيح حالەد بەن مۇحاممەد بەن زايد ءال ناحاياننىڭ قازاقستانعا رەسمي ساپارى اياسىندا استانادا Presight (G42) كومپانياسىنىڭ شەتەلدىك كەڭسەسى اشىلدى. ساپار بارىسىندا قازاقستان رەسپۋبليكاسىنىڭ تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگى مەن Presight كومپانياسى اراسىندا ەلىمىزدە سۋپەركومپيۋتەرلىك كلاستەر قۇرۋ جونىندە كەلىسىمگە قول قويىلدى.
«بۇل — ەلدىڭ تسيفرلىق ينفراقۇرىلىمىن دامىتۋداعى ستراتەگيالىق ماڭىزى بار قادام. ول قازاقستاننىڭ تسيفرلىق ەگەمەندىگىن جانە جي تەحنولوگيالارىن دامىتۋ مەن جاھاندىق IT ويىنشىلارىن تارتۋ باعىتىنداعى وڭىرلىك كوشباسشىلىعىن نىعايتادى», دەدى قازاقستان رەسپۋبليكاسىنىڭ تسيفرلىق دامۋ, يننوۆاتسيالار جانە اەروعارىش ونەركاسىبى ءمينيسترى جاسلان ماديەۆ.