مەديتسينالىق قىزمەتتەردىڭ ساپاسى مەن تيىمدىلىگىن ارتتىرۋ, حالىقتىڭ دەنساۋلىعىن جاقسارتۋ – مەملەكەتتىڭ باستى مىندەتتەرىنىڭ ءبىرى ەكەنى مەملەكەت باسشىسىنىڭ ءار جولداۋىندا ايتىلىپ كەلەدى. وسى رەتتە اباي ەلىنىڭ كوپتەن كوكەيىندە جۇرگەن وبلىستىق اۋرۋحانا سالۋ ماسەلەسىن شەشىلەتىن بولدى.
كۇنى كەشە سەمەيدە سالىناتىن وبلىستىق كوپسالالى اۋرۋحانانىڭ ىرگەتاسىن قالاۋ ءراسىمى بولدى. يگىلىكتى ءىس-شاراعا وبلىس اكىمى بەرىك ءۋالي جانە وسى سالانىڭ ارداگەرلەرى, دارىگەرلەر قاتىستى.
«پرەزيدەنتتىڭ تاپسىرماسىنا سايكەس بوي كوتەرەتىن عيمارات اباي وبلىسىن دامىتۋدىڭ كەشەندى جوسپارىنا ەنگەن. 300 توسەك-ورىندىق جاڭا كوپسالالى اۋرۋحانادا ءبىر اۋىسىمدا 250 ادامدى قابىلدايتىن كەڭەس بەرۋ جانە تەكسەرۋ ءبولىمى جۇمىس ىستەيتىن بولادى», دەيدى وبلىس اكىمىنىڭ ءباسپاسوز قىزمەتى.
ايماق باسشىسى بۇل مەديتسينالىق نىساننىڭ ءوڭىر تۇرعىندارى ءۇشىن ماڭىزى زور ەكەنىن جەتكىزدى.
«اباي وبلىسى – ەرتەدەن دارىگەرلىك ءداستۇرى قالىپتاسقان ءوڭىر. ايماعىمىزدان شىققان بىلىكتى ماماندار قازاق مەديتسيناسىنىڭ نەگىزىن قالادى. الايدا, سوڭعى شيرەك عاسىردا بۇل سالا نازاردان تىس قالىپ, بىلىكتى مامانداردىڭ باسقا وڭىرلەرگە قونىس اۋدارعانىن دا جاسىرا المايمىز. سوندىقتان بۇل اۋرۋحانانىڭ ىرگەتاسىن قالاۋ – سول ۇزىلگەن ءداستۇردى قايتا جالعاۋدىڭ نىشانى. مەردىگەر كومپانيا وكىلدەرى اتاپ وتكەندەي, اۋرۋحانا زاماناۋي مەديتسينالىق تەحنولوگيالارمەن جابدىقتالاتىن بولادى. ءبىز بۇل كۇندى اسىعا كۇتتىك. ويتكەنى, وبلىسىمىزدا وسى ۋاقىتقا دەيىن وسىنداي اۋرۋحانا بولعان ەمەس. ەندى, مىنە سول ولقىلىقتىڭ ورنى تولدى. ءوڭىر تۇرعىندارى اتىنان مەملەكەت باسشىسىنا العىس بىلدىرەمىز», دەدى وبلىس اكىمى.
اباي وبلىسىندا بۇگىندە 31 ستاتسيونارلىق مەديتسينالىق ۇيىم جۇمىس ىستەيدى, ونىڭ ىشىندە 20-سى مەملەكەتتىك, 11-ءى جەكەمەنشىك. ايماق كولەمىندە ءار 10 مىڭ تۇرعىنعا نەبارى 59 توسەك-ورىننان كەلەدى. بۇل – ەلىمىزدەگى ەڭ تومەنگى كورسەتكىشتەردىڭ ءبىرى.
وبلىستىق مامانداندىرىلعان مەديتسينالىق قىزمەتتىڭ 70 پايىزى سەمەي قالاسىندا شوعىرلانعان. قازىرگى ستاتسيونارلاردىڭ باسىم بولىگى ەسكى, ماتەريالدىق-تەحنيكالىق بازاسى توزعان. جەدەل مەديتسينالىق جاردەم اۋرۋحاناسى 300 توسەككە شاقتالعانىمەن ءىس جۇزىندە 375 ناۋقاستى قابىلداپ وتىر. كارديولوگيا, ينسۋلت, گينەكولوگيا, توكسيكولوگيا, نەۆرولوگيا, تراۆماتولوگيا بولىمدەرىندە توسەك-ورىن تاپشى. جاڭا اۋرۋحانا وسى تاپشىلىقتى جويىپ, زاماناۋي تالاپتارعا ساي مەديتسينالىق كومەك كورسەتۋدى قامتاماسىز ەتەدى. سونىمەن قاتار, اۋىل تۇرعىندارى ءۇشىن قاشىقتان كەڭەس بەرەتىن تەلەمەديتسينا ورتالىعى قۇرىلادى. مەديتسينالىق نىسان 2027 جىلى پايدالانۋعا بەرىلمەك.
اباي وبلىسى