تاراز. 20 ماۋسىم. جامبىل وبلىسى اكىمدىگى جانە «نۇر وتان» پارتياسى وبلىستىق فيليالىنىڭ قولداۋىمەن, ءال-فارابي اتىنداعى قازاق ۇلتتىق ۋنيۆەرسيتەتىنىڭ جۋرناليستيكا فاكۋلتەتى جانە «فوتوونەر» قوعامدىق بىرلەستىگىنىڭ ۇيىمداستىرۋىمەن جامبىل وبلىسىندا «قازاق حاندىعىنىڭ 550 جىلدىعىنا ارنالعان فوتوەكسپەديتسيا وتكىزىلۋدە. بۇل تۋرالى egemen.kz ءتىلشىسى حابارلادى.
سوعان سايكەس ەكسپەديتسيا مۇشەلەرى ءباسپاسوز ءماسليحاتىن وتكىزدى.
«ۇلت تاريحىن ۇرپاقتان-ۇرپاققا جەتكىزۋدە قازاق حاندىعىنىڭ 550 جىلدىق مەرەكەسىنىڭ ماڭىزى زور. تاريحىمىزدى تانۋ – فوتوشەجىرەسىز مۇمكىن ەمەس. وسىعان وراي ۇيىمداستىرىلعان فوتوەكسپەديتسيانىڭ ماقساتى – جامبىل وبلىسىنىڭ كونە تاريحي جەرلەرىن, سونىڭ ىشىندە بۇگىنگى كۇنى, رەسپۋبليكا بويىنشا ماڭىزى زور كەرەي مەن جانىبەك حانداردىڭ تۇڭعىش حاندىق قۇرعان قوزىباسى ايماعىن, قوراعاتى, اڭىراقاي دالاسى مەن حان تاعى ورىندارىن فوتوعا ءتۇسىرۋ», – دەيدى بۇل جونىندە قازۇۋ جۋرناليستيكا فاكۋلتەتىنىڭ دەكانى ساعاتبەك مەدەۋبەك ۇلى.
سونداي-اق, «فوتوونەر» بىرلەستىگىنىڭ توراعاسى اسىلحان ءابدىرايىم ەكسپەديتسيا ناتيجەسىندە تۇسىرىلگەن فوتوسۋرەتتەردەن الماتى قالاسىندا, ۋنيۆەرسيەتەتتە جانە مەملەكەتتىك دەڭگەيدە جوسپارلانعان تاراز قالاسىنداعى سالتاناتتى مەرەيتويدا كورمە وتكىزۋ كوزدەلۋدە ەكەنىن ايتتى.
سونىمەن قاتار, بۇل تۇسىرىلىمدەر كەلەر جىلى تاۋەلسىزدىگىمىزدىڭ 25 جىلدىعىنا وراي مەملەكەتتىك تاپسىرىسپەن جارىق كورەتىن «قازاق فوتوشەجىرەسى – تاريح, دەرەك, ونەر» اتتى فوتوالبومعا ەنەتىن بولادى. بۇل شارالار اتالعان تاريحي كەزەڭدە, ەلىمىزدە كەلەر ۇرپاقتى وتانسۇيگىشتىك رۋحتا تاربيەلەۋگە, بۇدان بولەك تۋريزم سالاسىنىڭ دامۋىنا ۇلكەن ۇلەس قوسادى.
ورالحان ءداۋىت.
دەرەك: egemen.kz.
سۋرەت: اقادىل رىسماحان.