اتىراۋ وبلىسىندا فۋتبول كلۋبى مەن 2 ءىرى سپورت نىسانى سەنىمگەرلىك باسقارۋدا بولعان. ەندى بۇل نىسانداردىڭ جۇمىسىنا وبلىستىق دەنە شىنىقتىرۋ, سپورت جانە تۋريزم باسقارماسى باقىلاۋ جۇرگىزەدى, دەپ حابارلايدى Egemen.kz.
باسقارما باسشىسىنىڭ مىندەتىن اتقارۋشى نۇربول سىدىقوۆتىڭ ايتۋىنشا, اتالعان نىساندار مەملەكەت باسشىسىنىڭ سپورتتىق ينفراقۇرىلىمدى ءتيىمدى دامىتۋ جونىندەگى تاپسىرماسىنا سايكەس قولعا الىنىپتى.
«سەنىمگەرلىك باسقارۋدا بولعان دەنە شىنىقتىرۋ-ساۋىقتىرۋ كەشەنى, مۇز ايدىنى مەن «اتىراۋ» وبلىستىق فۋتبول كومانداسى» جشس مەملەكەت مەنشىگىنە قايتارىلدى. بۇل وزگەرىس وڭىردەگى سپورت سالاسىنىڭ اشىقتىعى مەن تيىمدىلىگىن ارتتىرۋعا, اتالعان نىسانداردىڭ قىزمەت ساپاسىن جاقسارتۋعا جول اشادى. مەملەكەتتىك مەنشىككە وتكەننەن كەيىن بۇل مەكەمەلەردىڭ ماتەريالدىق-تەحنيكالىق بازاسىن جاڭارتۋ, قىزمەت ساپاسىن كوتەرۋ باعىتىندا جۇيەلى جۇمىستار جۇرگىزىلەدى», دەدى نۇربول سىدىقوۆ.
مەملەكەت مەنشىگىنە قايتارىلعان سپورتتىق نىسانداردا بالالار مەن جاسوسپىرىمدەرگە ارنالعان تەگىن ۇيىرمەلەر مەن سپورت سەكتسيالارىنىڭ جۇمىسى تۇراقتى تۇردە جالعاسادى. ەندى سەنىمگەرلىك باسقارۋداعى ورتالىق ءجۇزۋ باسسەينىن مەملەكەت مەنشىگىنە قايتارۋ جۇمىستارى باستالادى.