پرەزيدەنتتىڭ سايلاۋالدى باعدارلاماسىنىڭ باستى وزەگىن بەس ينستيتۋتتىق رەفورما قۇراعانى بەلگىلى. مەملەكەت باسشىسى الدىن الا ويلاستىرعان باستامالار مەن باعدارلامالاردىڭ جانە جارقىن جوبالار مەن رەفورمالاردىڭ باستى ەرەكشەلىگى – حالىققا جاقىن تۇرۋىندا. ءارى ونىڭ ورىندالۋى قول جەتپەستەي بيىك, كوش وتپەستەي شىڭىراۋ بولماۋى ءۇشىن قاجەتتى تەتىكتەرى جاسالاتىنىندا. ۇلىقتاۋ راسىمىنەن كەيىن پرەزيدەنت جارلىعىنا سايكەس ىلە-شالا قۇرىلعان جاڭعىرتۋ جونىندەگى ۇلتتىق كوميسسيانىڭ بولاشاقتا اتقاراتىن قىزمەتىنە دە وسىنداي پايىم دەڭگەيىنەن كوز تاستاعانىمىز ورىندى سەكىلدى.
وسى تۇرعىدا تىلدىك قورىمىز بەن لەكسيكونىمىزدا بۇرىننان قالىپتاسقان جاڭعىرتۋ دەگەن ءسوزدىڭ ءمانىسى مەن ماعىناسىنا تاعى ءبىر مارتە تەرەڭىرەك ۇڭىلە بىلگەنىمىز ءجون عوي دەپ ويلايمىن. مەنىڭ ويىمشا, جاڭعىرتۋ ۇعىمى بۇعان دەيىن ەل ءۇشىن ءبىراز يگىلىكتەردىڭ جاسالعانىنان حابار بەرە الادى. ياعني جاڭعىرتۋ تاقىر جەردەن تاۋ تۇرعىزۋ دەگەن تۇسىنىكپەن قاتار تۇرا المايدى. ونىمەن قوڭسى قونا المايدى. ويتكەنى, بەينەلەپ ايتقاندا, مۇنداي «تاۋ» بۇعان دەيىن دە تۇرعىزىلىپ ۇلگەرىلگەن. ەندى ونىڭ توبەسى مۇجىلمەۋى, ەتەگىن سۋ شايماۋى, ونىڭ تابيعاتتىڭ باسقا سىن-قاتەرلەرىنە توتەپ بەرە ءبىلۋى ءۇشىن ونى ودان ءارى بەرىك ەتە تۇسكەن ورىندى بولماق. وسىنداي قيسىنعا سايساق كەز كەلگەن قوعامدىق قۇندىلىقتىڭ عۇمىرى ۇزارىپ ماڭگىلىك بولا تۇسپەك.
پرەزيدەنت نۇرسۇلتان نازارباەۆتىڭ جاڭعىرتۋ جونىندەگى ۇلتتىق كوميسسيا تۋرالى جارلىعىنا وسىنداي وي ارناسىنان كەلسەك قاتەلەسپەيتىن شىعارمىز دەپ ويلايمىن. ەگەر ايتايىن دەگەن ويىمىزدى بۇدان ءارى تاعى دا ناقتىلاي تۇسسەك, اتالعان جارلىققا سايكەس قۇرىلعان جۇمىس توپتارىنىڭ ءارقايسىنا جاڭعىرتۋ ماسەلەلەرى تۇرعىسىنان تىڭ پىكىرلەر مەن ۇسىنىستار قوسۋعا بولادى. مىسالى, پرەزيدەنت اكىمشىلىگى باسشىسىنىڭ ورىنباسارى تالعات دوناقوۆ باسقاراتىن زاڭ ۇستەمدىگىن قامتاماسىز ەتۋ ءجونىندەگى جۇمىس توبىن الايىق. شىنتۋايتىنا كەلگەندە, مەملەكەتىمىزدە زاڭداردىڭ مۇلتىكسىز ورىندالۋى مەن ونىڭ ۇستەمدىگىن قامتاماسىز ەتۋ ماسەلەلەرىندە ءالى شەشىمىن تاۋىپ ءۇلگەرمەگەن جايتتار بار ەكەنى تالاس تۋعىزبايدى. ەگەر وسى ولقىلىعىمىز ءوز ورنىمەن جانە بارشا قازاقستاندىقتاردىڭ ەرىك-جىگەرىمەن شەشىمىن تاباتىن بولسا – بۇل فاكتور قۇقىقتىق مەملەكەت قالىپتاستىرا ءبىلۋىمىزدىڭ باستى العىشارتىنا اينالاتىنىنا سەنىم مول.
وسىنداي قيسىنعا ارقا سۇيەسەك, ۇلتتىق ەكونوميكا ءمينيسترى ەربولات دوساەۆ باسقاراتىن ەكونوميكا ماسەلەلەرى جونىندەگى جۇمىس توبىنىڭ الدىندا دا شۇعىل قولعا الاتىن ماسەلەلەر از ەمەس ەكەنىنە كوزىمىز ايقىن جەتە تۇسەدى. ۇلتتىق كوميسسيا تۋرالى ەرەجە مەن ۇلتتىق كوميسسيانىڭ جۇمىس جوسپارى جوباسى ءازىر بولعان كەزدە بۇگىنگى كۇنگە دەيىن بەيمالىمدەۋ بولىپ كەلگەن جاڭعىرتۋ جونىندەگى جوبانىڭ جارقىن بەتتەرى اشىلاتىنى انىق. قىسقاسى, جاڭعىرتۋ – بىتكەن ىستەردىڭ ەكىنشى تىنىسىن اشۋ جانە ونىڭ عۇمىرىن ودان ءارى ۇزارتۋ دەپ تۇسىنەمىن.
ايدار باتىرحانوۆ,
باتىس قازاقستان مادەنيەت
قىزمەتكەرلەرى كاسىپوداعى وبلىستىق كوميتەتىنىڭ توراعاسى.
ورال.