شىمكەنتتىكتەر تەمىرجول ۆوكزالىنان وتان قورعاۋشىلار كۇنى مەن ۇلى وتان سوعىسىنداعى جەڭىستىڭ 80 جىلدىعىنا ارنالعان استاناداعى اسكەري پارادقا قاتىسقان اسكەري قىزمەتشى قىزداردى ءسان سالتاناتپەن كۇتىپ الدى, دەپ جازادى Egemen.kz .
پويىز تۇنگى ۋاقىتتا كەلگەنىنە قاراماستان, پەررونداعى كۇتۋشىلەردىڭ جۇزدەرىنەن مەرەكەلىك شاتتىق لەبى ەسىپ تۇردى. پارادتا شەرۋ تارتقان ارۋلاردى گارنيزون باسشىلىعى, تۋعان-تۋىستارى مەن ارىپتەستەرى ءدال قارسى الدارىنان كۇتىپ الىپ ەرەكشە قۇرمەتكە بولەدى. الدىمەن پويىزدان تۇسكەن بويدا قىزدارعا گۇل شوقتارى تابىس ەتىلدى. ءوز اسكەري بولىمدەرى اتىنان مەملەكەتتىك ماڭىزدى ءىس-شارادا ابىرويمەن ونەر كورسەتكەندەرى ءۇشىن ولارعا شىنايى العىس سوزدەر مەن تىلەكتەر جاۋدىرىلدى.
گارنيزون باستىعىنىڭ ورىنباسارى, پودپولكوۆنيك قۋانىش ايدىنعاليەۆ قۇتتىقتاۋ ءسوز سويلەپ, پارادقا قاتىسۋشىلاردىڭ اسكەري ۇجىمدارىنداعى ابىرويى ەرەكشە ەكەنىنە توقتالدى.
«بۇل پارادتىڭ اۋقىمى مەن ماڭىزدىلىعىن ءتۇسىنۋ ءۇشىن مىنانى ايتقىم كەلەدى: مۇنداي جوعارى دەڭگەيلى سالتاناتتى شەرۋ ەلىمىزدە سوڭعى سەگىز جىلدا العاش رەت وتكىزىلدى. ول حالقىمىزدىڭ ەكىنشى دۇنيەجۇزىلىك سوعىستاعى ەرلىگىنىڭ قايتالانباس بەينەسى ءارى قازىرگى بۋىن جاۋىنگەرلەرىنە مۇرا بولىپ كەلە جاتقان اسكەري ءداستۇردىڭ تاماشا ساباقتاستىعى. وسى پارادقا قاتىسقان بارشا ساربازدارعا العىسىم شەكسىز. سىزدەرگە مىقتى دەنساۋلىق, وتباسىلىق باقىت جانە اسپانىمىز ءاردايىم اشىق بولسىن دەپ تىلەيمىز!» دەدى ول.
اسكەري مامانداردىڭ ايتۋىنشا جالپى پارادقا دايىندىق 45 كۇنگە سوزىلعان. وسى ۋاقىت ىشىندە اسكەري قىزمەتشىلەر ەلوردادا ارنايى ءىسساپاردا بولىپ, كۇن سايىن ءبىرتۇتاس ساپتىق قۇراممەن جاتتىعۋ وتكىزدى. بۇل شەرۋ ولاردىڭ شىدامدىلىعى مەن دەنەسىنىڭ فيزيكالىق دايىندىعىن شامالادى, سونىمەن بىرگە ساپتىق ماشىعىن جاڭا دەڭگەيگە كوتەردى. ەڭ باستىسى بارلىق قاتىسۋشى ايەلدەر قويىلعان ماقسات-مىندەتتەردى ابىرويمەن ورىنداپ شىققانىن ايتتى اسكەريلەر.
ال قىزداردىڭ ۇلكەن ءىس تىندىرىپ قايتۋى ولاردىڭ جاقىندارى مەن ارىپتەستەرى ءۇشىن شىن مانىندە ناعىز قۋانىشقا اينالدى. ول كەلۋشىلەردى قارسى الىپ جاتقانداردىڭ بال بۇل جايناعان جۇزىنەن, ەموتسياسىنان انىق بايقالدى. ۇزاق ساپاردان كەيىن ءبارى ءبىر-ءبىرىن ساعىنىسىپ قالعانى قۇشاعىنا قىسقان سالەمدەسۋلەرىنەن, ارقا-جارقا كوڭىلدەرىنەن, قۋانىشتان توگىلگەن كوز جاستارىنان انىق اڭعارىلىپ تۇردى.
شىمكەنت