الماتى قالالىق كارديولوگيالىق ورتالىعىندا ەرەكشە ءارى كۇردەلى وپەراتسيا جاسالىپ, دارىگەرلەر سيرەك كەزدەسەتىن جۇرەك ىسىگىنە شالدىققان جاس ايەلدىڭ ءومىرىن امان ساقتاپ قالدى. مامانداردىڭ ايتۋىنشا, پاتسيەنتتىڭ جۇرەگىندە انىقتالعان ميكسوما – ءدارى-دارمەكپەن ەمدەۋگە كەلمەيتىن, شۇعىل ارالاسۋدى قاجەت ەتەتىن قاتەرسىز ىسىك, دەپ جازادى Egemen.kz.
جاس ايەل ورتالىققا ەنتىگۋ مەن اۋا جەتىسپەۋشىلىگىنە شاعىمدانىپ تۇسكەن. ەحوكارديوگرافيا زەرتتەۋىنىڭ ناتيجەسىندە دارىگەرلەر سول جاق جۇرەكشەدە كولەمى 6×4 سانتيمەتر بولاتىن ميكسوما بارىن انىقتاعان. بۇل جۇرەكىشىلىك قاناينالىمعا كەدەرگى كەلتىرىپ, ومىرگە ناقتى قاۋىپ توندىرگەن.
كارديوحيرۋرگتار دەرەۋ وپەراتسيا جاساپ, ىسىكتى تولىقتاي الىپ تاستادى. حيرۋرگيالىق ارالاسۋدان كەيىن جۇرەك جۇمىسى قالىپقا كەلتىرىلىپ, كەلەسى كۇنى-اق پاتسيەنت وزدىگىنەن ءجۇرىپ-تۇرا باستادى. جاعدايى جاقسارعان ناۋقاس كوپ ۇزاماي ۇيىنە شىعارىلدى.
«مۇنداي كۇردەلى جاعدايلار دەر كەزىندە جۇرگىزىلگەن دياگنوستيكا مەن كاسىبي مەديتسينالىق كومەكتىڭ شەشۋشى ءرول اتقاراتىنىن كورسەتەدى. جاس ايەل ءومىردىڭ ەكىنشى مۇمكىندىگىنە يە بولدى. بۇل — دارىگەرلەر ءۇشىن ۇلكەن ماراپات», دەپ مالىمدەدى كارديولوگيالىق ورتالىقتىڭ ماماندارى.
ماماندار جۇرەك اۋرۋلارىنىڭ بەلگىلەرىن دەر كەزىندە بايقاپ, بىلىكتى دارىگەرگە جۇگىنۋدىڭ ءومىردى ساقتاپ قالۋداعى ماڭىزىن ەسكە سالىپ وتىر. الماتى كارديوحيرۋرگتارى كورسەتكەن جوعارى كاسىبي شەبەرلىك تاعى ءبىر ادام ءومىرىن امان ساقتاپ قالۋعا مۇمكىندىك بەردى.