قاراعاندى وبلىسىندا پارلامەنت سەناتىنىڭ كونستيتۋتسيالىق زاڭناما, سوت جۇيەسى جانە قۇقىق قورعاۋ ورگاندارى كوميتەتىنىڭ كوشپەلى وتىرىسى ءوتتى. بۇل جولعى باسقوسۋ ەلىمىزدىڭ سوت اكىمشىلىگىن دامىتۋدىڭ وزەكتى ماسەلەلەرىنە ارنالدى. وتىرىسقا سەنات دەپۋتاتتارىمەن قاتار جوعارعى سوتتىڭ سوت اكىمشىلىگى باسشىلىعى دا قاتىستى, دەپ جازادى Egemen.kz.
سەنات كوميتەتىنىڭ توراعاسى نۇرلان بەكنازاروۆ ءوز سوزىندە قوعامنىڭ سوت تورەلىگىنە قوياتىن تالابى كۇن سايىن ارتىپ كەلە جاتقانىن اتاپ ءوتتى. ونىڭ ايتۋىنشا, سوت جۇيەسىنىڭ تۇراقتى دامۋى, ونىڭ اشىقتىعى مەن ادىلەتتىلىگىن قامتاماسىز ەتۋ – قۇقىقتىق مەملەكەتتىڭ نەگىزگى شارتتارىنىڭ ءبىرى.
«سوت اكىمشىلىگى سوت تورەلىگىن تىكەلەي جۇزەگە اسىرمايدى, بىراق وعان قاجەت بارلىق جاعدايدى جاسايدى – كادردان باستاپ ينفراقۇرىلىمعا, تسيفرلىق پلاتفورمالار مەن بەينەبايلانىس جۇيەلەرىنە دەيىن. سوندىقتان بۇل قۇرىلىم سۋديالاردىڭ تاۋەلسىزدىگىن قامتاماسىز ەتۋدە جانە سوت جۇيەسىنىڭ تۇراقتى دامۋىن قولداۋدا تاپتىرماس تەتىك بولىپ وتىر», دەدى كوميتەت توراعاسى.
وتىرىستا ءسوز العان سوت اكىمشىلىگىنىڭ باسشىسى نايل احمەدزاكيروۆ قاتىسۋشىلارعا 2025–2029 جىلدارعا ارنالعان سوت اكىمشىلىگىن دامىتۋ ستراتەگياسىنىڭ نەگىزگى باعىتتارى جونىندە بايانداپ, جاڭا مىندەتتەرمەن تانىستىردى.
كەزدەسۋ بارىسىندا قاتىسۋشىلار سوتتاردىڭ ۇيىمداستىرۋشىلىق جۇمىسىن زاماناۋي تالاپتارعا ساي جەتىلدىرۋ جولدارىن تالقىلاپ, اشىقتىقتى قامتاماسىز ەتۋدە تسيفرلىق شەشىمدەردىڭ ماڭىزىنا توقتالدى.
وتىرىس قورىتىندىسى بويىنشا سەنات دەپۋتاتتارى سوت اكىمشىلىگىنىڭ تۇراقتى دامۋىن زاڭنامالىق جانە قارجىلىق تۇرعىدا قولداۋدىڭ ماڭىزدىلىعىن اتاپ ءوتتى. تسيفرلىق ترانسفورماتسيا مەن سوت جۇيەسىنىڭ تاۋەلسىزدىگىن نىعايتۋ باعىتىنداعى جۇمىستار – ادىلەتتى قوعام قۇرۋ جولىنداعى شەشۋشى قادام ەكەنى ايتىلدى.