الماتى وبلىسى بالقاش اۋدانىندا مال ۇرلىعىن «كاسىپ» ەتكەن كۇدىكتىلەر قولعا ءتۇستى. ولاردىڭ 10-نان استام مال ۇرلىعىنا قاتىسى بارى انىقتالعان, دەپ حابارلايدى Egemen.kz.
جەدەل ىزدەستىرۋ ءىس-شارالارى اياسىندا اتالعان اۋداندا بىرقاتار مال ۇرلىعىنا قاتىسى بار ءۇش ەر ادام ۇستالدى.
تەرگەۋ ءىسىنىڭ باستالۋىنا بەرەكە اۋىلىنان 8 شاقىرىم جەردە ورنالاسقان جايىلىمنان ءىرى قارا مالدىڭ جوعالعانى تۋرالى جەرگىلىكتى تۇرعىننىڭ ءوتىنىشى سەبەپ بولعان. جابىرلەنۋشىگە كەلتىرىلگەن جالپى شىعىن كولەمى 2,4 ميلليون تەڭگەنى قۇرايدى. اتالعان فاكت بويىنشا قىلمىستىق ءىس تىركەلىپ, سوتقا دەيىنگى تەرگەۋ امالدارى باستالدى.
«جەدەل ءىس-شارالار بارىسىندا بەرەكە اۋىلىنىڭ ماڭىندا پوليتسيا قىزمەتكەرلەرى «Volkswagen Jetta» اۆتوكولىگىن توقتاتتى. اۆتوكولىك سالونىندا ەكى ادام بولعان, كولىكتى تەكسەرۋ كەزىندە سيىر مالىنىڭ ەكى تۇتاس ەتى, تەگىس ۇڭعىلى مىلتىق, بالتا جانە اس ءۇي پىشاقتارى تابىلىپ, تاركىلەندى. كەيىن ءتارتىپ ساقشىلارى قىلمىستىق توپتىڭ تاعى ءبىر مۇشەسىن ۇستادى. كۇدىكتىلەردىڭ ۇشەۋى دە ۋاقىتشا ۇستاۋ يزولياتورىنا قامالدى», دەپ حابارلايدى وبلىستىق پوليتسيا دەپارتامەنتىنىڭ وكىلى.
قازىرگى ۋاقىتتا بۇل توپتىڭ 10-نان استام مال ۇرلىعىنا قاتىسى بارى دالەلدەندى. ولاردىڭ ايماقتاعى وسىعان ۇقساس باسقا دا قىلمىستارعا قاتىسى بار-جوعىن انىقتاۋ ءۇشىن تەرگەۋ امالدارى جۇرگىزىلۋدە.
الماتى وبلىسى