كەشە پرەزيدەنت جانىنداعى ورتالىق كوممۋنيكاتسيالار قىزمەتىندە «قازاقستان-2050» جالپىۇلتتىق قوزعالىسى بەلسەندىلەرىنىڭ قاتىسۋىمەن بريفينگ ءوتتى. وندا قوزعالىس كەڭەسىنىڭ توراعاسى دانات جۇمين ۇيىمنىڭ جىل باسىنان بەرى اتقارعان جۇمىسى جانە الداعى ۋاقىتقا بەلگىلەنگەن جوسپارلارى جونىندە بايانداپ بەردى.
«قازاقستان-2050» جالپىۇلتتىق قوزعالىسى جاستاردىڭ قوعام ومىرىنە بەلسەنە ارالاسۋىنا جاعداي جاساۋ ماقساتىندا اتقارىپ كەلە جاتقان جۇمىستارىن ويداعىداي ورىنداپ كەلەدى. ماسەلەن, ۇستىمىزدەگى جىلدىڭ باسىنان بەرى اتالمىش ۇيىم بىرقاتار جاڭا جوبالاردى قولعا الىپ, ولاردى ءوز دەڭگەيىندە جۇزەگە اسىرا بىلگەن.
بۇگىندە 8 مىڭ جاس ماماننىڭ باسىن بىرىكتىرىپ, ورتاق ىسكە جۇمىلدىرىپ وتىرعان قوزعالىستىڭ توراعاسى دانات ءجۇميننىڭ سوزىنە قاراعاندا, بۇل ۇيىم جەڭىستىڭ 70 جىلدىعىنا ورايلاستىرىپ, 5-8 جانە 9-11 سىنىپ وقۋشىلارى اراسىندا رەسپۋبليكالىق ەسسە بايقاۋىن جاريالاعان. «جەڭىس» جوباسىنىڭ اياسىندا ۇيىمداستىرىلعان جاس قالامگەرلەر كونكۋرسىنا ەلىمىزدىڭ بارلىق وڭىرلەرىنەن جانە شەتەلدەردەن 1 500-گە تارتا شىعارما كەلىپ ءتۇسكەن. ۇلى وتان سوعىسىندا قازاقستاندىقتاردىڭ ەرلىگىن ۇرپاققا ۇلگى ەتىپ, ولاردى وتانسۇيگىشتىككە تاربيەلەۋ ماقساتىندا ۇيىمداستىرىلعان بايقاۋعا جولدانعان ەسسەلەردىڭ ايماقتار بويىنشا ۇزدىكتەرىن ىرىكتەۋ ءىسى ءالى دە جۇرگىزىلىپ جاتقان كورىنەدى. ولاردىڭ ىشىندەگى تاڭداۋلى ەسسەلەردىڭ اۆتورلارىنا اقشالاي سىيلىقتار جانە گراموتالار بەرىلمەك. ال جالپى بايقاۋ بويىنشا «جۇزدەن ءجۇيرىك شىققان» 3 جۇمىس 15 مامىر كۇنى انىقتالماق. بۇل جەڭىمپازدار ءبىلىم جانە عىلىم مينيسترلىگىنىڭ ارنايى گراموتالارىمەن ماراپاتتالادى.
سونداي-اق, «قازاقستان-2050» قوزعالىسىنىڭ بەلسەندىلەرى «قازپوشتا» اكتسيونەرلىك قوعامىمەن بىرلەسە «نۇرلى جول» باعدارلاماسى اياسىندا سالىناتىن نىسانداردا جۇمىس ىستەيتىن جاستار ءۇشىن دە رەسپۋبليكالىق جوبانى قولعا الىپتى. دالىرەگى, «قازپوشتانىڭ» اۋىلدىق جەرلەردەگى بولىمشەلەرى ارقىلى اتالعان باعدارلاما بويىنشا جۇمىسقا ورنالاسقىسى كەلەتىن جاستاردان ءوتىنىش قابىلداۋ ۇيىمداستىرعان. بۇگىنگە دەيىن وسى ساناتتاعى 3 590 ازاماتتان ءوتىش ءتۇسىپتى. قازىرگى تاڭدا بۇل جاستارمەن تەلەفون ارقىلى بايلانىس ورناتىلعان. ەڭ باستىسى, ءبىلىم جانە عىلىم مينيسترلىگىمەن بىرلەسە ولاردى «جاسىل ەل» جەلىسى جانە «جۇمىسپەن قامتۋدىڭ جول كارتاسى» باعدارلاماسى نەگىزىندە جۇمىسقا تۇرعىزۋدىڭ جولدارى قاراستىرىلۋدا.
وسى ارادا تاعى ءبىر ايتا كەتەر جايت, «قازاقستان-2050» جالپىۇلتتىق قوزعالىسى مەملەكەتتىك قىزمەت كورسەتۋدىڭ ساپاسىن ارتتىرۋعا, سىبايلاس-جەمقورلىققا جاعداي تۋعىزاتىن اكىمشىلىكتىك كەدەرگىلەردى جويۋعا سەپتىگىن تيگىزۋ ءۇشىن I-Azamat جوباسىن ىسكە اسىرۋعا قۇلشىنىس ءبىلدىرىپ وتىر.
جالپى, بۇگىندە 8 مىڭ جاستى ءبىر باعىتقا – ەلىمىزدىڭ دامۋىنا قولداۋ بىلدىرۋگە جۇمىلدىرىپ وتىرعان بۇل ۇيىمنىڭ بەتالىسى وڭدى. بەلسەندى جاستارىمىزدىڭ ءوز وتاندارىنا دەگەن قۇرمەتتەرىن وسىلايشا ناقتى ىسپەن ءبىلدىرۋى, ارينە, قۋانتارلىق جايت.
جولدىباي بازار,
«ەگەمەن قازاقستان».