اتىراۋ. 3 تامىز. اتىراۋدا 1 تامىزدان باستاپ سۋ جانە كارىز ءتاريفىنىڭ باعاسى قىمباتتادى. بۇل تۋرالى egemen.kz ءتىلشىسى حابارلادى.
اتىراۋ قالاسىن سۋمەن قامتاماسىز ەتەتىن «اتىراۋ سۋ ارناسى» كوممۋنالدىق مەملەكەتتىك كاسىپورنىنىڭ ءتاريفتى ءوسىرۋ جونىندەگى ۇسىنىسى تابيعي مونوپوليالاردى رەتتەۋ جانە باسەكەلەستىكتى قورعاۋ دەپارتامەنتى تاراپىنان قولداۋ تاپتى. اتالعان دەپارتامەنت باسشىسىنىڭ ورىنباسارى السەيىت سابىروۆتىڭ ءمالىم ەتۋىنشە, بۇدان بىلاي جەكە تۇلعالار سۋدىڭ ءبىر تەكشە مەترى ءۇشىن 101 تەڭگە 33 تيىن تولەيتىن بولدى. بۇرىن بۇل باعا 68 تەڭگە 28 تيىن ەدى. ال زاڭدى تۇلعالارعا ءبىر تەكشە مەتر سۋدى پايدالانعانى ءۇشىن تاريف قۇنى ەندى 316 تەڭگە 72 تيىندى قۇراماق. بۇل باعا وسى كەزگە دەيىن 189 تەڭگە 7 تيىن دەڭگەيىندە ساقتالىپ كەلگەن بولاتىن.
«اتىراۋ سۋ ارناسى» باسشىلارى ءتاريفتىڭ قىمباتتاۋىنا بىرنەشە سەبەپتى العا تارتىپ وتىر. بىرىنشىدەن, كاسىپورىن شىعىنى كوبەيگەن بولسا, ەكىنشىدەن, قاجەتتى ماتەريالدار مەن حيميالىق رەاگەنتتەر باعالارىنىڭ ءوسۋى اسەر ەتكەن. ۇشىنشىدەن, سۋ تاريفتەرىن قالىپتاستىرۋدىڭ جاڭا تەتىكتەرىن ەنگىزۋگە بايلانىستى كەشەندى جوسپاردى جۇزەگە اسىرۋ قاجەتتىگى تۋىنداپتى. تورتىنشىدەن, كاسىپورىننىڭ ينۆەستيتسيالىق باعدارلاماسىن ىسكە اسىرۋ كوزدەلىپتى.
سونىمەن بىرگە, اتىراۋدا كارىز جۇيەسى ءتاريفى دە قىمباتتادى. ەندى اتىراۋلىق جەكە تۇلعالار ءبىر تەكشە مەترگە 35 تەڭگەدەن, ال وزگە تۇتىنۋشىلار 151 تەڭگە 98 تيىن تولەۋگە ءماجبۇر بولادى. بۇل قىزمەتكە تولەنەتىن باعا بۇرىن تيىسىنشە, 31 تەڭگە 39 تيىن جانە 122 تەڭگە 12 تيىن بولعان ەدى.
جولداسبەك شوپەعۇل.
دەرەك: egemen.kz.
سۋرەت: dknews.kz.