جول قۇرىلىسى جوسپارعا ساي جۇرۋدە

كەشە ورتالىق كوممۋنيكاتسيالار قىزمەتىندە ينۆەستيتسيالار جانە دامۋ مينيسترلىگى اۆتوكولىك جولدارى كوميتەتى توراعاسىنىڭ ورىنباسارى امانگەلدى بەكوۆ پەن «قازاۆتوجول» ۇك» اق باسقارما توراعاسى ەرمەك قيزاتوۆ ءباسپاسوز ءماسليحاتىن وتكىزدى. وندا «نۇرلى جول» باعدارلاماسىن جۇزەگە اسىرۋ شارالارى ءسوز بولدى. ەلىمىزدىڭ كەلەسى كەزەڭدەگى دامۋىندا باستى قۇجات بولىپ تابىلاتىن «نۇرلى جول» مەملەكەتتىك باعدارلاماسى بويىنشا 2015-2019 جىلدارى رەسپۋبليكادا 11 اۆتوكولىك جولىنىڭ جوباسى جۇزەگە اسىرىلادى ەكەن. ناتيجەسىندە, 7 مىڭ شاقىرىمنان استام جول قايتا جاڭعىرتىلاتىن كورىنەدى. وسىنى ايتقان كوميتەت توراعاسىنىڭ ورىنباسارى, ءار با­عىتتى اتاپ ءوتتى. – «نۇرلى جول» باع­دار­لاماسى اياسىندا «باتىس ەۋروپا – با­تىس قىتاي» جوباسىن اياقتاۋ, «ور­تالىق – وڭتۇستىك», ورتالىق – شى­عىس», «ورتالىق – باتىس», «الماتى – وسكەمەن», «قىزىلوردا – جەزقازعان-قاراعاندى», «استانا – پەتروپاۆل», «ورال – كامەنكا», سونداي-اق, «استانا قالاسىنىڭ وڭتۇستىك اينالما جولى», «جەتىباي – جاڭاوزەن» جانە «ءۇشارال – دوستىق» جوبالارى قولعا الىنادى. اتالعان جوبالاردىڭ جالپى قۇنى 2,4 ترلن. تەڭگەنى قۇرايدى. سونىڭ ارقاسىندا, جالپى العاندا 7 مىڭنان استام شاقىرىمدى قايتا جاڭارتۋ جوس­پارلانۋدا. وسى ماقساتتارعا ۇلتتىق قوردان 2015-2016 جىلدارعا 301 ملرد. تەڭگە بولىنەتىن بولادى», دەدى ا.بەكوۆ. بۇلارمەن بىرگە, 1 ترلن. تەڭگە نەمەسە 5,5 ملرد. دوللار كولەمىندە بولاتىن قارجى جونىندە مينيسترلىك الدىن الا كەلىسسوزدەر جۇرگىزىپ, جىل سوڭىنا دەيىن 12 كەلىسىمگە قول قويۋدى جوسپارلاپتى. «اتاپ ايتساق, ورتالىق-وڭتۇستىك جوباسى بويىنشا قارىزعا الىنعان قاراجاتقا قاراعاندىدان باستاپ كۋرتوۆقا دەيىن جول سالىنادى. بۇعان 2,6 ملرد. دوللار كولەمىندە دۇنيەجۇزىلىك بانك پەن ەۋروپالىق بانكتىڭ قارىزى جۇمسالادى. «ورتالىق – باتىس» جوباسىنا دۇنيەجۇزىلىك بانك, يسلام بانكى مەن ازيا دامۋ بانكىنىڭ قاراجاتتارىن تارتۋ كوزدەلگەن. شامامەن 1,5 ملرد. دوللار كولەمىندە قارجى تارتىلادى. «اقتوبە – اتىراۋ – استراحان» جوباسى بويىنشا 960 ملن. دوللار كولەمىندە ازيا دامۋ بانكى مەن يسلام بانكىنەن ينۆەستيتسيا تارتۋ كوزدەلۋدە. «جەتىباي – جاڭاوزەن» جوباسىن جۇزەگە اسىرۋ ءۇشىن 140 ملن. دوللار كولەمىندە ازيا دامۋ بانكىنەن, ال «ۇزىناعاش – وتار» جوباسىنا دۇنيەجۇزىلىك بانك­تەن 213 ملن. دوللار كولەمىندە قارجى تارتىلادى. وسى جوبالار بويىنشا بيىل تەحنيكالىق نەگىزدەمە ازىرلەنىپ, قۇرىلىس جۇمىستارىن كەلەسى جىلدىڭ ەكىنشى توقسانىندا باستاۋ كوزدەلىپ وتىر», دەدى كوميتەت توراعاسىنىڭ ورىنباسارى. وسى كەزدە قۇرىلىس باستالىپ كەتكەن تەمىرتاۋ – قاپشاعاي تاس جو­لىن­داعى 1000 شاقىرىم جولدى جوندەپ, جاڭارتۋ جۇمىستارى 2019 جى­لى تولىق اياقتالادى ەكەن. «نۇرلى جول» باع­دار­لاماسى بويىنشا ينفرا­قۇ­رى­لىمدى دامىتۋ جونىندەگى ۇلتتىق وپەراتور «قازاۆتوجول» كومپانياسى كەلە­سى باعىتتار بويىنشا جۇمىستار اتقا­رىپ جاتىر. «استانا –الماتى» باعى­تى بويىنشا, قاراعاندى, تەمىرتاۋ, بال­قاش, قاپشاعاي قالالارى ارقى­لى وتەتىن «استانا – الماتى» تاس جولى­نىڭ 1 282 شاقىرىمىندا جوندەۋ جۇمىس­تارى جۇرگىزىلۋدە. بۇل تاس جول 4 جانە 6 جولاقتى 1-ءشى كاتەگوريا­لى جولدار قاتارىنا جاتاتىن بولادى. جىل سوڭىندا استانا مەن تەمىر­تاۋ, سونداي-اق, الماتى مەن قاپشا­عاي قالالارىنىڭ اراسىنداعى ءبىر-ءبىر جولاقتى پايدالانۋعا بەرەمىز. جول­دىڭ ەكىنشى جولاعى كەلەسى جىلى اياقتا­لادى. شامامەن 1000 شاقىرىمدى قۇراي­تىن تەمىرتاۋ قالاسىنان قاپ­شاعاي­عا دەيىنگى اۋماقتىڭ جوبالىق-سمەتا­لىق قۇجاتتاماسى ازىرلەنىپ جاتىر. جوبا رەسپۋبليكالىق بيۋدجەت پەن دۇنيە­جۇزىلىك بانكتىڭ قارىزى ەسەبىنەن قارجى­لان­دىرىلادى», دەدى باسقارما توراعاسى ە.قيزاتوۆ. نۇرباي ەلمۇراتوۆ, «ەگەمەن قازاقستان».