«بەكىرە-2015» اكتسياسى باستالعالى, 1 ساۋىردەن بەرى قاراي 226 تابيعات قورعاۋ زاڭناماسىنىڭ بۇزىلعاندىعى انىقتالسا, ونىڭ ىشىندە بالىقتى زاڭسىز اۋلاۋدىڭ – 198, بالىقتى زاڭسىز تاسىمالداۋدىڭ 20 فاكتىسى تىركەلگەن. اتالعان زاڭ بۇزۋشىلىق بويىنشا اكىمشىلىك جاۋاپكەرشىلىككە 171 ادام تارتىلعان. سونداي-اق, 28 قىلمىستىق ءىس قوزعالىپ, 51 ماتەريال سوت ورگاندارىنا جولداندى.
بۇل جونىندە پرەزيدەنت جانىنداعى ورتالىق كوممۋنيكاتسيالار قىزمەتىندە وتكەن بريفينگتە اۋىل شارۋاشىلىعى ۆيتسە-ءمينيسترى ەرلان نىسانباەۆ مالىمدەدى. ونىڭ ايتۋىنشا, بالىق قورعاۋ ينسپەكتورلارى براكونەرلەردەن 27 توننا بالىق, ونىڭ ىشىندە, 1 توننا بەكىرە بالىعى, شامامەن 18 كيلو ۋىلدىرىق, 1200 بالىق اۋلاۋ مەن 176 ءجۇزۋ قۇرالدارىن تاركىلەگەن. جالپى, مەملەكەت بويىنشا بالىق قورعاۋ ينسپەكتورلارى 2014 جىلى اكىمشىلىك قۇقىق بۇزۋشىلىق تۋرالى 6764 حاتتاما تولتىرىپ, 979 قۇقىق بۇزۋشى اكىمشىلىك جاۋاپكەرشىلىككە تارتىلدى, 50 ادام سوتپەن قىلمىستىق جاۋاپكەرشىلىككە جازالاندى, دەدى ە.نىسانباەۆ.
سونىمەن قاتار, بەكىرە بالىعىن زاڭسىز اۋلاعانى ءۇشىن 2000 ەڭ تومەنگى ەسەپتىك كورسەتكىش كولەمىندە ايىپپۇل نەمەسە 2 جىلعا دەيىن باس بوستاندىعىنان ايىرۋ قاراستىرىلىپ وتىرعانىن اتاپ ءوتتى. جانە دە وسىنداي زاڭ بۇزۋشىلىق اياسىندا تابيعاتقا كولەمدى زالال كەلتىرىلگەن جاعدايدا, سونداي-اق بالىق اۋلاۋ ۇيىمداسقان تۇردە ىسكە اسسا, ول كەزدە 2 جىلدان 5 جىلعا دەيىن باس بوستاندىعىنان ايىرۋ جازاسى قولدانىلاتىن بولادى, دەدى ۆيتسە-مينيستر.
رەسپۋبليكادا 35-كە جۋىق بالىق ءوسىرۋ كاسىپورىندارى بار. اگروونەركاسىپتىك كەشەندى دامىتۋعا ارنالعان «اگروبيزنەس-2020» باعدارلاماسىندا تاۋارلىق بالىق ءوسىرۋدى دامىتۋ ءۇشىن مەملەكەتتىك قولداۋ شارالارى قاراستىرىلعان, دەي كەلە ۆيتسە-مينيستر كاسپي تەڭىزىنىڭ بيولوگيالىق رەسۋرستارىن, اسىرەسە, بەكىرە تۇقىمداس بالىق تۇرلەرىن ساقتاۋعا زور ءمان بەرىلىپ وتىرعاندىعىن كولدەنەڭ تارتتى. وسىعان بايلانىستى 2010 جىلى كاسپي تەڭىزىمەن شەكارالاس مەملەكەتتەردىڭ ءۇشىنشى ءسامميتى وتكەننەن كەيىن ەلباسى نۇرسۇلتان نازارباەۆ كاسپي تەڭىزىنىڭ سۋ بيولوگيالىق رەسۋرستارىن ۇتىمدى پايدالانۋ جانە ساقتاۋ كەلىسىمىن تالقىلاۋدى جالعاستىرۋدى, سونداي-اق 5 جىل مەرزىمگە دەيىن كاسپيدە بەكىرە بالىعىن كوممەرتسيالىق اۋلاۋعا موراتوري ەنگىزۋ مەحانيزمىن ازىرلەۋدى تاپسىرعان بولاتىن, دەدى.
وسىنىڭ اياسىندا وتكەن جىلدىڭ قىركۇيەك ايىندا استراحان قالاسىندا بۇل كەلىسىمگە كاسپي تەڭىزىمەن شەكارالاس 5 مەملەكەت قول قويدى. بالىق شارۋاشىلىعىن ودان ءارى دامىتۋ, قولدانىستاعى نورماتيۆتىك-قۇىقتىق بازانى جەتىلدىرۋ ماقساتىندا, ۇكىمەتتىڭ 2015 جىلعى زاڭ جوبالارى جوسپارىنا سايكەس مينيسترلىك قازاقستان رەسپۋبليكاسىنىڭ كەيبىر زاڭنامالىق اكتىلەرىنە ءوسىمدىكتەر مەن جانۋارلار دۇنيەسى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى زاڭ جوباسىن ازىرلەدى. قۇجات كاسپي تەڭىزىنىڭ سۋ بيولوگيالىق رەسۋرستارىن ۇتىمدى پايدالانۋ جانە ساقتاۋ ماسەلەسىن, سونداي-اق, ورتاق بيولوگيالىق رەسۋرستاردى باسقارۋدى رەتتەيدى. قازىرگى تاڭدا ەلىمىزدىڭ اۋىل شارۋاشىلىعى مينيسترلىگى كەلىسىمنىڭ كۇشىنە ەنۋىنە قاجەتتى راسىمدەر ازىرلەۋدە, دەدى ە.نىسانباەۆ.
ەلميرا ماتىباەۆا,
«ەگەمەن قازاقستان».