قاراعاندى وبلىسىنىڭ اۋداندىق ۆەتەرينارلىق ستانتسيالارى 66 جاڭا كولىكتىڭ كىلتىن الدى. وڭىردە اۆتوپاركتىڭ مۇنداي اۋقىمدى جاڭارتىلۋى العاش رەت ورىن الىپ وتىر. بۇل ۆەتەرينارلىق قىزمەت ماماندارىنا ءوز جۇمىستارىن ءتيىمدى اتقارۋعا مۇمكىندىك بەرەدى, دەپ حابارلايدى Egemen.kz.
ماشينالار جەتى اۋداندىق ستانتسيا مەن قاراعاندى, بالقاش قالالارى اراسىندا تاراتىلدى. وبلىس اكىمى ەرماعانبەت بولەكپاەۆ وڭىردەگى ۆەتەرينارلىق ۇيىمداردىڭ ماتەريالدىق-تەحنيكالىق بازاسىن نىعايتۋ مەن مامانداردى قولداۋدىڭ ماڭىزدىلىعىن اتاپ ءوتتى.
«بۇگىن ءبىز سىزدەرگە جاڭا قىزمەتتىك اۆتوكولىكتەردىڭ كىلتىن تابىس ەتىپ وتىرمىز. بۇل سىزدەرگە كۇندەلىكتى جۇمىستا قاجەت تەحنيكا, سوندىقتان سىزدەر شاقىرۋلارعا تەزىرەك شىعىپ, قاجەت جەرلەردە كومەك كورسەتە الاسىزدار», دەدى وبلىس اكىمى.
اباي اۋداندىق ۆەتەرينارلىق ستانتسياسىنىڭ باسشىسى ازامات سامەنباەۆ كولىكتەردىڭ بەرىلۋىن كوپتەن كۇتكەندەرىن, اۋدان اۋماعى 15 وكرۋگتەن تۇراتىندىقتان ساپارلار كۇن سايىن جۇرگىزىلەتىنىن, جاڭا كولىك – اسىرەسە پروفيلاكتيكالىق ءىس-شارالار كەزەڭىندە جاقسى قولداۋ بولاتىنىن اتاپ ءوتتى.
اۆتوپاركتى جاڭارتۋ وبلىستىڭ ۆەتەريناريا سالاسىن دامىتۋ جونىندەگى جۇيەلى جۇمىستىڭ ءبىر بولىگىنە اينالدى.
– اۋداندىق ستانسالاردى قولداۋ – باسىمدىقتاردىڭ ءبىرى. ماشينالار پروفيلاكتيكالىق جانە شۇعىل ۆەتەرينارلىق ءىس-شارالاردا پايدالانۋ ءۇشىن اۋىلدىق اۋداندار مەن قالالارعا جىبەرىلەدى. بۇل سالاداعى جۇمىستىڭ تيىمدىلىگىن ارتتىراتىنى ءسوزسىز. ولار بيولوگيالىق ماتەريالداردان سىناما الۋ ءۇشىن ەلدى مەكەندەرگە بارىپ, زەرتحاناعا جەتكىزەدى, سونداي-اق, ماشينالار مالدى ۆاكتسينالاۋ كەزىندە جەدەل قىزمەتتەردىڭ جۇمىسىنا كومەكتەسەدى, – دەيدى وبلىستىق ۆەتەريناريا باسقارماسىنىڭ باسشىسى اماندىق جاكەتاەۆ.
قاراعاندى وبلىسى