قازاقستاندىق ارالاس جەكپە-جەك (مما) شەبەرى بەكزات الماحان UFC-دەگى العاشقى جەڭىسىنە قول جەتكىزدى, دەپ حابارلايدى Egemen.kz.
سپورتشى كانادانىڭ مونرەال قالاسىندا وتكەن UFC 315 تۋرنيرىندە ونەر كورسەتتى. ونىڭ جەڭىل سالماقتاعى (61,2 كيللوگرامعا دەيىن) قارسىلاسى كانادالىق برەد كاتون بولدى.
جەكپە-جەك ءۇش راۋندقا جوسپارلانعانىمەن, مەرزىمىنەن بۇرىن اياقتالدى. جەكپە-جەك باستالعان ساتتەن-اق قازاقستاندىق سپورتشى قارسىلاسىنىڭ باسىنان ءدال ءتيىپ, اپپەركوت جاسادى. كاتون قۇلاپ ءتۇسىپ, الماحاننىڭ بۇل سوققىسىنان كەيىن تورەشى جەكپە-جەكتى توقتاتتى.
وسىلايشا, جەكپە-جەكتىڭ ەكىنشى مينۋتىنىڭ باسىندا 27 جاستاعى الماحان قارسىلاسىن تەحنيكالىق نوكاۋتقا ءتۇسىرىپ, UFC-دەگى العاشقى جەڭىسىنە قول جەتكىزدى.
ونىڭ پروموۋشەندەگى دەبيۋتتىك جەكپە-جەگى بىلتىر ناۋرىزدا وتكەن بولاتىن. ول كەزدە تورەشىلەردىڭ ءبىراۋىزدان قابىلداعان شەشىمىمەن قازاقستاندىق سپورتشى رەسەيلىك ۋمار نۋرماگومەدوۆتەن جەڭىلىس تاپقان ەدى.
الماحان كاسىپقوي مما-دە بارلىعى 12 جەكپە-جەكتە جەڭىسكە جەتىپ, ەكى رەت جەڭىلگەن.
كاتون بولسا, مانسابىندا العاش رەت نوكاۋتپەن جەڭىلىسكە ۇشىرادى. 33 جاستاعى كانادالىقتىڭ ەنشىسىندە بۇگىندە 14 جەڭىس پەن بەس جەڭىلىس بار. ايتا كەتەيىك, كاتون — The Ultimate Fighter شوۋىندا ەكى رەت چەمپيونى اتانعان تاريحتاعى جالعىز بوكسشى.