تۇركىستان وبلىسى قازىعۇرت اۋدانىندا جەڭىستىڭ 80 جىلدىعى جانە كەڭەس وداعىنىڭ باتىرى ءاليا مولداعۇلوۆانىڭ 100 جىلدىق مەرەيتويىنا وراي قازاقتىڭ ءۇش باتىر قىزى مانشۇك مامەتوۆا, ءاليا مولداعۇلوۆا جانە حيۋاز دوسپانوۆاعا ارنالعان ەڭسەلى ەسكەرتكىش اشىلدى, دەپ جازادى Egemen.kz.
ساراپحانا اۋىلىنداعى تاريحي-ەتنوگرافيالىق «ماڭگىلىك ەل» ساياباعىندا بوي كوتەرگەن, اتى اڭىزعا اينالعان قازاقتىڭ باتىر قىزدارىنا ارنالعان ەڭسەلى ەسكەرتكىشتىڭ سالتاناتتى اشىلۋ راسىمىنە تۇركىستان وبلىسى مەن شىمكەنت قالاسىنىڭ سوعىس جانە ەڭبەك ارداگەرلەرى, زيالى قاۋىم وكىلدەرى مەن اۋدان تۇرعىندارى قاتىستى. قولادان قۇيىلعان, جالپى بيىكتىگى – 5,5 مەتر كومپوزيتسيالىق مونۋمەنتتىڭ ارتىندا بيىكتىگى 6,5 مەتر بولاتىن ستەللا بار. ءمۇسىنشى – ءابىلحان باياليەۆ. شىمكەنت – تاشكەنت حالىقارالىق كۇرە جولىنىڭ بويىندا الىستان مەنمۇندالايتىن ەسكەرتكىش ساياباقتىڭ ورتاسىندا ورنالاسقان. ەرلىك پەن ورلىكتىڭ, نازىكتىك پەن نامىستىڭ سيمۆولىنا, ۇلت ماقتانىشىنااينالعان باتىر قىزداردىڭ بەينەسى «جەتى جارعى» جانە «قوجابەرگەن جىراۋ» حالىقارالىق قوعامدىق قورىنىڭ دەمەۋشىلىگىمەن بوي كوتەردى.
«ۇلتتىق قۇرىلتايدىڭ ءۇشىنشى وتىرىسىندا مەملەكەت باسشىسى قاسىم-جومارت توقاەۆ سۇراپىل سوعىس كەزىندەگى اعا بۋىننىڭ وشپەس ەرلىگى مەن ەرەن ەڭبەگىن ۇرپاق جادىندا جاڭعىرتۋ وتە ماڭىزدىەكەنىن اتاپ ءوتتى. سونداي-اق پرەزيدەنت باتىرلارىمىزدىڭ ەسىمى ەلدى مەكەندەرگە, ءتۇرلى نىساندارعا, كوشەلەرگە بەرىلگەنىن, ۋچيليششەلەردى, اۆياتسيا بازالارىن جانە اۋەجايلاردى باتىر قىراندارىمىزدىڭ ەسىمىمەن اتاۋ داستۇرگە اينالعانىن جانە بۇل باعىتتاعى جۇمىستى جالعاستىرۋ قاجەتتىگىن ايتتى. اتىراۋدا وتكەن سول قۇرىلتايدان سوڭ ىسكە كىرىسىپ, بۇگىندە وسىناۋ ەڭسەلى ەسەرتكىشتى اشىپ وتىرمىز. ءۇش باتىر قىزدىڭ ەرلىگىن دارىپتەۋ ماقساتىنداعى يگى ىسكە باستاماشى بولعانىما قۋانىشتىمىن. ەرلىك ەشقاشان ۇمىتىلمايدى. جانقيارلىق پەن ەرلىكتىڭ وزىق ۇلگىسىن كورسەتكەن باتىرلارىمىزدىڭ ەسىمىن وسىنداي يگى ىسپەن ۇلىقتاۋ ارقىلى دا جاس ۇرپاققا بەيبىت ءومىردىڭ, تىنىشتىقتىڭ قادىرىن تەرەڭ ءتۇسىندىرۋدى ماقسات ەتتىك», دەيدى «جەتى جارعى جانە قوجابەرگەن جىراۋ» حالىقارالىق قوعامدىق قايىرىمدىلىق قورىنىڭ توراعاسى, بەلگىلى زاڭگەر, قازاقستاننىڭ ەڭبەك سىڭىرگەن قايراتكەرى بەكەت تۇرعاراەۆ.
ايتا كەتەلىك, اۋماعى 10 گەكتار «ماڭگىلىك ەل» ساياباعىندا قازاقتىڭ ءۇش بيىنەن باستاپ, سالقام جاڭگىر حان مەن ءجالاڭتوس باتىر, الاش ارىستارى, اناعا تاعزىم, ەكىنشى دۇنيەجۇزىلىك سوعىس ارداگەرلەرىنە ارنالعان 30-عا جۋىق ەسكەرتكىش ورىن تەپكەن. ساياباق اۋماعىندا 5 مىڭ ءتۇپ اعاش ەگىلگەن. بۇل ساياباق بۇگىندە 110 مىڭ حالقى بار قازىعۇرت اۋدانى تۇرعىندارىنىڭ سۇيىكتى دەمالىس ورنىنا اينالعان. سونداي-اق وڭىردە ءتۋريزمنىڭ دامۋىنا وزىندىك ۇلەس قوسىپ كەلەدى.