بۇگىن ەلوردادا «بەيبىت اسپان استىندا» اتتى اۋقىمدى قوعامدىق-مادەني ءىس-شارا ۇيىمداستىرىلدى. سوعىس ەرلىگىن جاس ۇرپاققا جەتكىزۋ, جاۋىنگەرلىك ءداستۇردى جالعاستىرۋعا باعىتتالعان ءىس-شارا - ۇلى وتان سوعىسىنىڭ باتىرلارى مەن تىل ەڭبەككەرلەرىنىڭ ەرەن ەڭبەگىنە جانە جانقيارلىق ەرلىگىنە قۇرمەت, دەپ جازادى Egemen.kz.
اشىق اسپان استىنداعى كونتسەرتتىك باعدارلامادا قازاقستاندىق انشىلەر, مۋزىكالىق جانە بي ۇجىمدارى ونەر كورسەتىپ, سوعىس جىلدارىنىڭ اندەرى شىرۇالىپ, بي قويىلىمدارى مەن بالالار سپەكتاكلدەرى ساحنالاندى.
«ەستەلىك قابىرعاسى» – ارحيۆتىك فوتوسۋرەتتەر مەن مايدان حاتتارىنىڭ بىرەگەي كورمەسى;
اشىق اسپان استىنداعى كينوتەاتر – سوعىس تۋرالى فيلمدەردىڭ اشىق اسپان استىندا كورسەتىلىمى;
ينتەراكتيۆتى الاڭدار: 1940-جىلدار ستيلىندەگى فوتوبۋدكا, بەيبىتشىلىك پەن جەڭىس تاقىرىبىندا وريگامي جانە سۋرەت سالۋ شەبەرحانالارى;
ء«بىزدىڭ باتىرلار» يممەرسيۆتى ينستاللياتسيالار مەن سيتي-لايتتار – قازاقتىڭ ۇلى جاۋىنگەرلەرىنىڭ وبرازدارى قوناقتاردىڭ ەرەكشە ىقىلاسىنا يە بولدى.
«بۇگىنگى مەرەكە كەرەمەت وتۋدە. جىلى ءارى جايلى اتموسفەرا بولدى. ءبىز بالالارىمىزبەن كەلدىك. جاس ۇرپاق اتا-اجەلەرىنىڭ جانە اتالاردىڭ ەرلىگىن ءبىلۋى, ەستە ساقتاۋى كەرەك. ولاردىڭ ەرلىگى – حالىق تاريحى. ۇيىمداستىرۋشىلارعا جانە استانا اكىمدىگىنە ۇلكەن العىس», دەدى كونتسەرتتى تاماشالاعان جۇماعۇلوۆتار وتباسى.
باعدارلامادا ۇرپاقتار ساباقتاستىعىنا ەرەكشە ءمان بەرىلدى. ءىس-شاراعا مايدان ارداگەرلەرى, قوعامدىق بىرلەستىكتەر وكىلدەرى, وقۋشىلار مەن ستۋدەنتتەر قاتىستى. جاستار ءۇشىن قازاقستان تاريحى تۋرالى ارنايى دارىستەر مەن شەبەرلىك ساباقتارى وتكىزىلدى, بۇل تاريحي جاۋاپكەرشىلىك پەن پاتريوتتىق سانانى قالىپتاستىرۋعا ماڭىزدى قادام بولدى.